Мінэнерга Беларусі ўсё яшчэ працягвае перамовы па будаўніцтве трэцяга блока БелАЭС. Як заявіў міністр энергетыкі Дзяніс Мароз беларускаму тэлебачанню, у найбліжэйшы час могуць быць зафіксаваны тэрміны будаўніцтва блока.
“Было прынята рашэнне аб будаўніцтве трэцяга блока нашым прэзідэнтам. Больш за тое, ён паставіў задачу не толькі будаваць трэці блок тут, на пляцоўцы Беларускай АЭС, таму што тут створана ўся інфраструктура, ёсць магчымасці, ёсць кампетэнцыі, ёсць людзі. Ён і сказаў пра тое, што трэба прапрацаваць будаўніцтва другой атамнай электрастанцыі ў нашай краіне.
Таму мы сёння працуем над двума гэтымі праектамі. Калі казаць пра трэці блок, то сёння мы з дзяржкарпарацыяй Расатам вядзём вельмі шчыльныя перамовы. Упэўнены, што мы ў найбліжэйшы час іх фіналізуем і ўжо ў рамках нейкага пагаднення зможам зафіксаваць параметры і канкрэтныя тэрміны рэалізацыі гэтага праекта”, – сказаў Мароз.
Увесну прадстаўнікі беларускага і расійскага бакоў заяўлялі, што дамовы на трэці энергаблок павінны быць заключаны да канца гэтага года.
У снежні мінулага года Мароз казаў, што трэці энергаблок можа ўступіць у строй у 2035 годзе. Да гэтага тэрміну айчынная энергасістэма будзе гатова да яго інтэграцыі. Увод трэцяга энергаблока ў строй, паводле яго слоў, планаваўся на 2035-2038 гады.
