Міністэрства адукацыі вынесла на грамадскае абмеркаванне праект пастановы Саўміна «Аб рэестры фізічных асоб, якія ажыццяўляюць самастойную прафесійную дзейнасць па навучанні дзяцей». Абмеркаванне праходзіць на Прававым форуме да 1 чэрвеня.
Пастанова прадугледжвае, што самастойная прафесійная дзейнасць па навучанні дзяцей можа ажыццяўляцца пасля ўключэння фізічнай асобы ў рэестр. Пры гэтым такая дзейнасць без уключэння ў рэестр забараняецца.
Праект распаўсюджваецца на наступныя віды самастойнай прафесійнай дзейнасці, якая ажыццяўляецца ў дачыненні да непаўналетніх дзяцей:
- навучанне (без рэалізацыі зместу адукацыйных праграм) працы на персанальным камп’ютары, ноўтбуку, планшэтным камп’ютары, смартфоне;
- навучанне (без рэалізацыі зместу адукацыйных праграм) выяўленчаму мастацтву, ігры на музычных інструментах, танцам, харэаграфіі, вакалу, аратарскаму мастацтву;
- рэпетытарства;
- паслугі настаўніка-дэфектолага (у тым ліку настаўніка-лагапеда, тыфлапедагога, сурдапедагога, алігафрэнапедагога).
“Прыняцце праекта пастановы дазволіць мінімізаваць магчымасць ажыццяўлення самастойнай прафесійнай дзейнасці па навучанні дзяцей фізічнымі асобамі, у дачыненні да якіх уступіў у законную сілу абвінаваўчы прысуд суда за здзяйсненне злачынстваў экстрэмісцкай накіраванасці, злачынстваў, прадугледжаных артыкуламі 139, 145 – 147, 154, часткамі 2 і 3 артыкула 165, артыкуламі 166 – 172, часткай 2 артыкула 173, артыкуламі 181 – 182, 187, 327 – 329, 331, 332, 342-1, 343, 343-1 Крымінальнага кодэкса Рэспублікі Беларусь, незалежна ад зняцця або пагашэння судзімасці, а таксама аказання паслуг настаўніка-дэфектолага, настаўніка-лагапеда, тыфлапедагога, сурдапедагога, алігафрэнапедагога асобамі, якія не маюць адпаведнай адукацыі”, — гаворыцца ў абгрунтаванні праекта.
Фізічным асобам, якія займаюцца самастойнай прафесійнай дзейнасцю па навучанні дзяцей, давядзецца падаваць ва ўпаўнаважаны орган заявы пра ўключэнне ў рэестр, а таксама паведамляць яму пра ўзнікненне факту абмежавання на працу з дзецьмі. Упаўнаважаным органам вызначаны Дэпартамент кантролю якасці адукацыі.
Мяркуецца, што пастанова ўступіць у сілу праз тры месяцы пасля яе публікацыі.
