Скриншот видео
Аляксандр Лукашэнка на сённяшняй нарадзе па пытаннях праектаў з замежнымі краінамі папракнуў прамысловасць за праблемы з якасцю. Ён таксама звярнуў увагу на складанасці ў некаторых холдынгах.
«На пачатку гэтага года нашы прадпрыемствы спрацавалі нядрэнна. Экспарт у цэлым. Я хачу, каб разумелі ўсе: я прэм’ер-міністру персанальна на другі дзень яго працы даручыў: паглядзі ўважліва за нашымі прамысловымі прадпрыемствамі і прамысловасцю ў цэлым. Мяне турбуе, нягледзячы на невялікі рост у прамысловасці, дзякуй богу, падзення няма. Вы фарміруеце, што па экспарце нядрэнна, а гэта галоўнае, таму што ў нас экспартна арыентаваная краіна. Навошта вырабляць, калі не можам прадаць? І звяртаў вашу ўвагу на якасць», — сказаў ён.
Паводле яго слоў, для яго рыхтуюць спецыяльныя агляды, у якіх збіраюць водгукі беларусаў і іншых спажыўцоў пра айчынную прадукцыю. Там хапае негатыву.
«Вось цяпер я чарговы агляд, які рыхтуе мне прэс-служба прэзідэнта, паглядзеў. Яны манітораць усё па факце і выпісваюць мне на стол крытычныя заўвагі ад нашых людзей. Па “Атланце” там, гэта што такое? Я, вядома, разумею, што нехта там піша: “Я ўбачыла нейкую драпіну на халадзільніку”.
Два гады эксплуатавала халадзільнік, убачыла драпіну. Ну, добра, але калі ты на новым халадзільніку бачыла драпіну ў краме, не трэба было купляць яго. Там жа не адзін халадзільнік стаяў. І гэта ёсць. Але дыму без агню не бывае. І ў нас “Атлант”, напэўна, не ў самым лепшым стане цяпер. І дзе маё патрабаванне па якасці? І я прыклад прывёў. Гэта датычыцца не толькі “Атланта”», — сказаў ён.
Лукашэнка таксама звязаў пытанне якасці з эканамічнымі праблемамі прадпрыемстваў.
«Таму міністр павінен зарубіць сабе на носе, што нават дробязь ад людзей — у мяне гэта на кантролі. Я не хацеў бы, каб, прысаджвайся, у мяне складвалася пра вас дрэннае ўражанне, а праз вас — пра ўрад. І прэм’ер-міністр павінен разумець, што ў нас у сярэднім тэмпература нібыта нядрэнная і экспарт ідзе.
Але ёсць тры, чатыры, пяць прадпрыемстваў, а гэта не проста прадпрыемствы, а цэлыя аб’яднанні, холдынгі, вытворчыя аб’яднанні, якія ў нас ні хістка ні валіцца працуюць. Трэба разбірацца неадкладна і спыняць гэта на корані, асабліва па якасці. Але калі вы не можаце вырабіць такія аб’ёмы, то зрабіце якасны прадукт, каб людзі хацелі купіць вашы тавары», — сказаў ён.