Аляксандр Лукашэнка падчас перамоў з прэзідэнтам Узбекістана Шаўкатам Мірзіёевым выкарыстаў незвычайную дыпламатычную фармулёўку. Ён прапанаваў асвяціць дамоўленасці і папрасіць Алаха, каб усё было рэалізавана.
Лукашэнка пачаў з таго, што нагадаў пра ўчарашнюю нефармальную размову. Ён падкрэсліў, што чакаў яго ў Мінску як сябра. Паводле яго слоў, ён гатовы зрабіць усё, каб візіт быў паспяховым. Лукашэнка адзначыў, што палітыка дзвюх краін супадае.
«Мы за шматпалярнасць. Мы не хочам нікому перашкаджаць. Мы глядзім на наш народ, Узбекістан — на свой народ. Але ў той жа час вядзём вельмі актыўную працу, каб звязаць нашы інтарэсы», — сказаў ён, перадае яго прэс-служба.
Паводле яго слоў, Узбекістан з’яўляецца трэцім партнёрам Беларусі сярод краін СНД па аб’ёмах гандлю. Абарот складае 1 млрд долараў, а цяпер пастаўлена мэта дасягнуць 2 млрд долараў.
«Вельмі важна, каб акрамя сумесных праектаў (тут мы абавязацельствы жорстка будзем выконваць) мы з вашай дапамогай маглі выйсці і на трэція краіны, асабліва якія блізкія Узбекістану там. У іх вялікая цікавасць, і мы разам будзем працаваць. Тым больш што гэтая праца пачалася», — сказаў ён.
Лукашэнка адзначыў поспехі ў прамысловым супрацоўніцтве.
«Мы асвоілі ў вас ужо сумесную вытворчасць 130-тоннага БелАЗа. Гатовыя выйсці на 220-тонны. Трэба рухацца ў гэтым плане. Калі будзе такая ж падтрымка, як цяпер з вашага боку ва Узбекістане, мы вельмі хутка гэта зробім.
Па трактарабудаванні вы ўчора казалі — пад 3 тыс. можам выйсці. Мы забяспечым сэрвіснае абслугоўванне. Увогуле, зробім па ўсім машынабудаўнічым комплексе так, што сорамна не будзе», — сказаў ён.
Ён таксама адзначыў перспектывы ўзаемадзеяння ў сельскай гаспадарцы і ахове здароўя, культурным абмене.
«Мы асвяцім усё тое, што было зроблена да гэтага дня. Прадстаўнікі бізнесу сустрэліся, велізарная колькасць кампаній, дамовіліся пра многае. Гуманітарны аспект таксама адпрацаваны. Мы ўчора тры гадзіны вялі дыялог. Што нам тут засталося? Як у царкве кажуць, “асвяціць”; Алаха папрасіць, каб гэта ўсё было рэалізавана. Што мы і зробім», — падсумаваў ён.
На перамовах у пашыраным складзе Лукашэнка ўдакладніў, што аб’ём гандлю ў 2 млрд долараў павінен быць дасягнуты да 2030 года. Ён таксама адзначыў некаторыя сумесныя праекты.
«Два гады таму стартаваў наш першы інвестыцыйны праект у сельскагаспадарчай галіне — стварэнне ў Ташкенцкай вобласці перадавога птушкагадоўчага комплексу поўнага цыклу — ад атрымання інкубацыйных яек да перапрацоўкі мяса і рэалізацыі гатовай прадукцыі.
Вітаем цікавасць узбекскага бізнесу да стварэння сучасных жывёлагадоўчых комплексаў на Віцебшчыне. Для вас гэта магчымасць вырабляць і пастаўляць ва Узбекістан высакаякасную мясную прадукцыю, якую вырабіце самі, а для Беларусі — людзі, працоўныя месцы і развіццё вёскі», — сказаў ён.
У выніку Лукашэнка прыйшоў да высновы, што адносіны паміж дзвюма краінамі пераходзяць на новы ўзровень.
«Прэзідэнт толькі што сказаў мне, што размова, якая ў нас адбылася ў вузкім складзе, — дзеля гэтага трэба было прыехаць у Беларусь. Бо мы дамовіліся пра прынцыпова новы падыход у нашых адносінах па адчувальных для Узбекістана і Беларусі напрамках супрацоўніцтва.
Каб нашы амбіцыйныя планы былі ўвасоблены ў жыццё, урады падрыхтавалі дарожную карту, якая вызначае асноўныя напрамкі сумеснай працы на пяцігодку. Тоны, штукі, адказныя, тэрміны. Ключавым сярод іх з’яўляецца вытворчая кааперацыя, якая ўносіць істотны ўклад у тэхналагічны суверэнітэт Узбекістана», — дадаў ён.
