Першыя кадры сённяшняй сустрэчы Уладзіміра Пуціна і Аляксандра Лукашэнкі ў падмаскоўнай дзяржаўнай рэзідэнцыі “Нова-Агарова” апублікавалі іх прэс-службы. Лукашэнка прызнаўся, што падчас нядаўняга візіту ў Мінск першага намесніка старшыні ўрада РФ Дзяніса Мантурава абмяркоўвалася тэма сумеснай вытворчасці мікраэлектронікі.
Спачатку пра сумесныя праекты ў мікраэлектроніцы загаварыў Пуцін.
“І што самае важнае, на мой погляд, самае прынцыповае – гэта тое, што мы ўзаемадзейнічаем і на традыцыйных напрамках, але і на напрамках, якія сёння з’яўляюцца асабліва важнымі. Гэта высокія тэхналогіі.
І тут я яшчэ раз дазволю сабе паўтарыць: дзякуючы вашым шматгадовым намаганням Беларусь многае захавала і прымножыла з таго, што было створана яшчэ ў часы Савецкага Саюза. І цяпер мы разам можам працягваць рух па гэтых напрамках, уключаючы мікраэлектроніку і некаторыя іншыя напрамкі”, – адзначыў прэзідэнт РФ.
Тэму падтрымаў Лукашэнка.
“Вы маеце рацыю, тавараабарот у нас прыбаўляецца – гэта як мінімум 12%. Там яшчэ трэба палічыць. Мы значна перасягнём узровень мінулага года ў нашым тавараабароце. І прыемна, што ў гэтым тавараабароце вялікае месца, як вы сказалі, займае сучасная электроніка. Учора мы з Міхаілам Уладзіміравічам (Мішусцін – заўв. reform.news) абмяркоўвалі вядомую вам тэму аб аб’яднанні намаганняў у электроніцы. У нас ёсць нядрэнныя кампетэнцыі. І нядаўна Дзяніс Мантураў прыязджаў да нас, глядзеў гэтыя прадпрыемствы са спецыялістамі.
Мы выпрацоўвалі нейкую форму ўзаемаадносін у гэтым плане. Але хачу вам сказаць, што адзінае меркаванне вашага ўрада, мой пункт гледжання, нашага ўрада – мы тут абсалютна не застанемся голымі і без гэтых тавараў мікраэлектронікі. Мы абсалютна ўсё… мы сёння ўсё ствараем, што трэба, разам. Заўтра мы выйдзем на вельмі высокі ўзровень. Таму форму мы знойдзем. Гэта не пытанне, як і па іншых напрамках супрацоўніцтва”, – заявіў у адказ Лукашэнка.
