Лукашэнка: адносіны Беларусі і Казахстана пры Такаеве палепшыліся

Рэдакцыя Reform.news · 1 кастрычніка 2026, 12:51

https://reform.news/be/lukashjenka-adnosiny-belarusi-i-kazahstana-pry-takaeve-palepshylisja/

Аляксандр Лукашэнка сустрэўся з прэм’ер-міністрам Казахстана Олжасам Бектэнавым у Мінску 1 кастрычніка.

Лукашэнка назваў Казахстан цікавым партнёрам і заявіў, што пры Касым-Жамарце Такаеве адносіны паміж краінамі палепшыліся.

«Яшчэ раз хачу падкрэсліць, я пра гэта публічна ўжо казаў: Казахстан для нас вельмі цікавы партнёр і дружалюбная для нас краіна. І калі ваша вока зачэпіцца за нешта ў Беларусі ў плане машынабудавання (а гэта для Казахстана важна, як і для Беларусі), у галіне развіцця сельскай гаспадаркі, высокіх тэхналогій і іншых пытанняў, — закрытых тэм няма, мы з задавальненнем будзем з вамі працаваць. Прытым адносіны паміж нашымі краінамі з даўніх часоў вельмі добрыя.

Пры цяперашнім Прэзідэнце яны не пагоршыліся, а, наадварот, палепшыліся. Касым-Жамарт Кемелевіч надае вялікую ўвагу развіццю нашых адносін. І я вельмі задаволены гэтым. Мы часта закранаем тэму паляпшэння нашых адносін у плане прывязкі нашых эканомік», — заявіў Лукашэнка.

Лукашэнка таксама заявіў, што беларусы і казахі звязаныя крывёй.

«Вы павінны ведаць, што вы прыехалі не да чужых людзей. Беларусы — вашы блізкія людзі. Крывёй павязаныя мы, калі можна так па-народнаму сказаць, таму што вельмі многія казахстанцы абаранялі Беларусь у гады Вялікай Айчыннай вайны і тут праславіліся. Мы гэта цэнім, нікога не забылі. Таму нашы адносіны сыходзяць у мінулыя стагоддзі, а можа быць, кудысьці туды далей. Можа, мы яшчэ не ўсё ведаем, ну, пакапаемся у нашай гісторыі, нешта знойдзем», — адзначыў Лукашэнка.