Аляксандр Лукашэнка на сустрэчы з новым генсекам АДКБ Таалатбекам Масадыкавым, прадстаўніком Кыргызстана, выклаў сваё бачанне працы арганізацыі. У якасці прыкладу ён ацаніў магчымыя дзеянні Кыргызстана ў выпадку канфлікту ў Беларусі.
“Беларусь заўсёды была лакаматывам развіцця адносін у АДКБ і іншых структурах на нашай прасторы былога Савецкага Саюза. Нашы падыходы абсалютна адкрытыя. Мы не цямнім, нічога не хаваем. Што тычыцца АДКБ, першапачаткова я прапанаваў яшчэ даўно, калі зараджалася гэтая арганізацыя (ды і да яе), формулу дзеянняў. Мы разумеем, што цэнтральным звяном у гэтай арганізацыі з’яўляецца Расія. І ўсім трэба выдатна разумець, што, напрыклад, на заходнім напрамку асноўным звяном АДКБ, натуральна, з’яўляецца Беларусь.
І не дай бог нейкі канфлікт на гэтым напрамку, Расія заўсёды павінна мець тут ядро ўзброеных сіл, якія падключацца да дзеянняў беларускай арміі, каб абараніць нашу прастору. На поўдні, вядома, прыйдзецца напружвацца і вам, і Казахстану. Абавязкова. Бо гэта паўднёвы напрамак і, зноў жа, Расія будзе вас падтрымліваць. І падпіраць, як вайскоўцы кажуць”, – сказаў Лукашэнка, перадае яго прэс-служба.
Ён узгадаў пра накіраванне войскаў саюзнікаў у Казахстан у студзені 2022 года падчас беспарадкаў у гэтай краіне.
“Я выдатна разумею, што калі раптам нейкі канфлікт у Беларусі, то сваімі ўзброенымі сіламі на 100% Кыргызстан не будзе ўключацца і не ўключыцца. Магчыма, і не трэба. Але ўпэўнены, што і падтрымка палітычная будзе, і ваенная ў нейкай ступені. Ну і наадварот. Таму я і казаў пра тое, што цэнтральным звяном павінна з’яўляцца ў нас Расійская Федэрацыя, яе ўзброеныя сілы. Гэта натуральна.
У нас большасць узбраення савецкае, вырабляецца ў Расійскай Федэрацыі. Тактыка ў нас аднолькавая — постсавецкіх рэспублік. Таму абараняцца нам прыйдзецца разам. Маючы на ўвазе, што на галоўных напрамках будуць дзейнічаць тыя дзяржавы, якія знаходзяцца на гэтых напрамках. Такая была філасофія прапанавана. Жыццё паказала, што менавіта ў такім ключы мы і будзем дзейнічаць”, – працягнуў Лукашэнка.
Разам з тым ён не выключае, што можа скласціся сітуацыя, калі ўсім краінам АДКБ прыйдзецца дзейнічаць разам.
“Думаю, што ў гэтым плане мы будзем дзейнічаць і ў далейшым. Хоць я не выключаю, што можа скласціся такая сітуацыя, што мы ўсе разам плячо да пляча ўсімі нашымі ўзброенымі сіламі і ўзбраеннямі будзем абараняць нашу прастору, на якой павінна функцыянаваць наша арганізацыя”, – сказаў ён.
