Латушка падзякаваў Літве за зварот у МКС па пытанні Лукашэнкі

Рэдакцыя Reform.news · 1 красавіка 2026, 12:38

https://reform.news/be/latushka-padzjakava-litve-za-zvarot-u-mks-pa-pytanni-lukashjenki/

Намеснік старшыні Аб’яднанага пераходнага кабінета, кіраўнік НАУ Павел Латушка падзякаваў Літве за ініцыяванне расследавання Міжнароднага крымінальнага суда ў дачыненні да Аляксандра Лукашэнкі.

Ён сустрэўся з міністрам унутраных спраў Літвы Уладзіславам Кандратовічам у межах 50-й сесіі Кангрэса мясцовых і рэгіянальных уладаў Савета Еўропы. Як паведамілі ў АПК, Латушка “выказаў падзяку за прынцыповую пазіцыю ў пытаннях прыцягнення да адказнасці прадстаўнікоў рэжыму Лукашэнкі за здзяйсненне злачынстваў супраць чалавечнасці і ў дачыненні да беларускага народа”.

Ён падкрэсліў, што падчас усіх сваіх сустрэч падымае пытанне пра важнасць гэтай працы і падкрэслівае лідарства Літвы, а таксама выступае за далучэнне да расследавання іншых краін.

“Падчас свайго знаходжання ў Страсбургу Павел Латушка праводзіць кансультацыі з кіраўнікамі дыпламатычных місій і сакратарыятам Савета Еўропы па пытаннях прыцягнення Лукашэнкі да адказнасці за злачынствы супраць беларускага народа, агрэсію супраць Украіны і ваенныя злачынствы, звязаныя з незаконнай дэпартацыяй украінскіх дзяцей з часова акупаваных тэрыторый Украіны ў Беларусь і іх далейшай ідэалагічнай апрацоўкай у духу «рускага свету», — дадалі ў АПК.