Кантрабандысты вярнуліся да старых метадаў у Літве — перакідкі цыгарэт праз мяжу

Рэдакцыя Reform.news · 10 красавіка 2026, 23:20

https://reform.news/be/kantrabandysty-vjarnulisja-da-staryh-metada-u-litve-perakidki-cygarjet-praz-mjazhu/

Літоўскія памежнікі затрымалі 1300 пачак беларускіх цыгарэт і мясцовага жыхара, які прыняў тавар на мяжы.

Памежнікі дзяжурылі ў раёне вёскі Сенове ў Варэнскім раёне і заўважылі, як з боку Беларусі ў Літву перакідваюць нейкія пакеты. На месца здарэння накіравалася група памежнікаў і кінолаг з сабакам.

Сабака ўзяў след, і праз некаторы час памежнікі дагналі мужчыну, які нёс дзевяць звязаных паміж сабой пакетаў. Унутры аказалася 1300 пачак беларускіх цыгарэт. Іх кошт ацэньваецца ў амаль 7 тысяч еўра, паведамляе памежная служба Літвы.

Мужчыну затрымалі. Як высветлілася, за апошнія тры гады 27-гадовага мясцовага жыхара ўжо 13-ты раз затрымліваюць за кантрабанду цыгарэт. У дачыненні да яго распачаты адміністрацыйны працэс.

Варта адзначыць, што ў апошнія гады кантрабандысты звычайна выкарыстоўваюць больш тэхналагічныя сродкі для дастаўкі цыгарэт — дроны і метэазонды.