Фото: gov.pl
Акруговы суд у Замосці прызнаў вінаватым 50-гадовага грамадзяніна Польшчы Паўла К. па артыкулах аб шпіянажы і незаконным валоданні зброяй. Яму прызначана пакаранне ў выглядзе 3,5 года пазбаўлення волі.
Мужчына быў затрыманы ў красавіку 2024 года. Тады паведамлялася, што яго затрыманне стала вынікам сумеснай аперацыі польскіх і ўкраінскіх службаў.
“Вынікі расследавання паказваюць на тое, што Павел К. паведаміў пра гатоўнасць працаваць на ваенную выведку Расійскай Федэрацыі і ўсталёўваў кантакты з грамадзянамі Расійскай Федэрацыі, якія непасрэдна ўдзельнічалі ў ваенных аперацыях на тэрыторыі Украіны.
У абавязкі абвінавачанага ўваходзіў збор і перадача інфармацыі, якая датычылася бяспекі інфраструктуры аэрапорта Жэшув-Ясёнка.
Гэтая дзейнасць магла быць выкарыстаная расійскімі спецслужбамі, у тым ліку ў кантэксце планавання магчымага замаху на кіраўніка замежнай дзяржавы, а менавіта прэзідэнта Украіны Уладзіміра Зяленскага“, — гаворыцца ў паведамленні Нацыянальнай пракуратуры Польшчы.
Таксама мужчына выказваў гатоўнасць уступіць у дыверсійныя структуры, у тым ліку ў Групу Вагнера, а таксама далучыцца да в/ч 29155 Галоўнага разведвальнага ўпраўлення Генштаба РФ.
Прысуд яшчэ не ўступіў у законную сілу. Ён можа быць абскарджаны і апратэставаны.