Дэпутаты ў першым чытанні падтрымалі выкарыстанне музыкі на тэлебачанні без дазволу праваўладальнікаў

Музычныя творы можна будзе выкарыстоўваць на тэлебачанні без дазволу праваўладальнікаў пры ўмове выплаты ім узнагароджання. Такая норма змяшчаецца ў законапраекце «Аб змяненні законаў па пытаннях прававой аховы аб’ектаў інтэлектуальнай уласнасці», які Палата прадстаўнікоў сёння прыняла ў першым чытанні.

“Гэта звязана са спецыфікай тэлевізійнай вытворчасці, калі трэба вельмі часта аператыўна атрымаць нейкую згоду ад праваўладальнікаў альбо аўтараў музычных твораў, але далёка не заўсёды гэта магчыма. Таму права на свабоднае выкарыстанне прадастаўляецца, але яшчэ раз падкрэслю — пры ўмове абавязковай выплаты справядлівага ўзнагароджання”, – пракаментаваў намеснік старшыні Пастаяннай камісіі па адукацыі, культуры і навуцы Палаты прадстаўнікоў Вячаслаў Даніловіч.

Праект прадугледжвае, што музыка можа быць выкарыстана “пры стварэнні і (або) распаўсюджванні рэдакцыямі тэлевізійных СМІ асобных тэлеперадач са складу тэлепраграм, якія ўваходзяць у абавязковы агульнадаступны пакет тэлепраграм”.

Таксама праектам прадугледжваецца:

• аптымізацыя адміністрацыйных працэдур, якія ажыццяўляюцца патэнтным органам (Нацыянальным цэнтрам інтэлектуальнай уласнасці) у рамках дзейнасці па прадастаўленні прававой аховы аб’ектам інтэлектуальнай уласнасці;
• устанаўленне парадку рэгістрацыі ў патэнтным органе дагавораў аб закладзе выключнага права ў дачыненні да вынаходстваў, карысных мадэляў, прамысловых узораў, сартоў раслін, тапалогій інтэгральных мікрасхем;
• удакладненне парадку выплаты аўтарам узнагароджання за выкарыстанне службовых твораў навукі, вынаходстваў, карысных мадэляў, прамысловых узораў, сартоў раслін, тапалогій інтэгральных мікрасхем, сакрэтаў вытворчасці (ноу-хау);
• удакладненне асобных тэрмінаў і тэрмінаў дзеяння выключнага права на творы навукі, літаратуры і мастацтва (на працягу жыцця аўтара і 70 гадоў пасля яго смерці).