Ціханоўская расказала пра шэсць інструментаў пераследу беларусаў за мяжой

Рэдакцыя Reform.news · 14 кастрычніка 2026, 20:58

https://reform.news/be/cihano-skaja-raskazala-pra-shjesc-instrumenta-perasledu-belarusa-za-mjazhoj/

Святлана Ціханоўская расказала пра шэсць інструментаў пераследу беларусаў за мяжой. Гэта прагучала 14 кастрычніка на мерапрыемстве ў Варшаве ў рамках Варшаўскай канферэнцыі па чалавечым вымярэнні АБСЕ, паведамілі ў Офісе лідара дэмсіл.

Выступленне адбылося на сустрэчы «Транснацыянальныя рэпрэсіі рэжыму Лукашэнкі: неабходны скаардынаваны міжнародны адказ». У мерапрыемстве таксама ўдзельнічаў дарадца Ціханоўскай па прававых пытаннях Леанід Марозаў. На сустрэчы прадставілі два новыя даклады: даследаванне iSANS аб эвалюцыі транснацыянальных рэпрэсій і даклад «Wanted by Dictator: Red Notice State», падрыхтаваны Офісам Ціханоўскай сумесна з BELPOL пры падтрымцы «Кіберпартызанаў».

Ціханоўская пералічыла шэсць інструментаў, якія, паводле яе слоў, выкарыстоўваюцца для ціску на беларусаў за мяжой.

Першым яна назвала ўключэнне журналістаў, актывістаў і праваабаронцаў у спісы «экстрэмістаў» і «тэрарыстаў», што можа выкарыстоўвацца для стварэння праблем пры перасячэнні межаў, атрыманні віз і адкрыцці банкаўскіх рахункаў.

Другі — ціск праз сваякоў, якія засталіся ў Беларусі. Сілавікі могуць затрымліваць блізкіх, каб прымушаць людзей за мяжой да супрацоўніцтва або пэўных дзеянняў, адзначыла палітык.

Трэці інструмент — завочныя судовыя працэсы, калі людзей судзяць без іх прысутнасці, а вынесеныя прысуды могуць суправаджацца канфіскацыяй маёмасці.

Чацвёрты — пазбаўленне магчымасці атрымання і абнаўлення дакументаў за мяжой, што ўскладняе легалізацыю і стварае дадатковыя праблемы пры ўзаемадзеянні з міграцыйнымі службамі.

Пяты інструмент — выкарыстанне Інтэрпола і механізмаў міжнароднага вышуку, калі палітычны пераслед могуць прадстаўляць як крымінальную справу, дамагаючыся міжнароднага вышуку і экстрадыцыі беларусаў.

Шосты — лічбавыя пагрозы, калі боты, тролі і агенты рэжыму ў інтэрнэце пранікаюць у супольнасці, пагражаюць людзям і перашкаджаюць іх працы.

Ціханоўская заклікала міжнародных партнёраў уключыць праблему транснацыянальных рэпрэсій у свой парадак дня і ўзмацніць узаемадзеянне з беларускім дэмакратычным рухам, праваахоўнымі органамі і арганізацыямі грамадзянскай супольнасці.

«Процідзеянне транснацыянальным рэпрэсіям патрабуе поўнай каардынацыі», – заявіла яна.