Ціханоўская: Навошта рабіць з нашай краіны мішэнь для адказу на ядзерны ўдар?

Рэдакцыя Reform.news · 18 мая 2026, 16:28

https://reform.news/be/cihano-skaja-navoshta-rabic-z-nashaj-krainy-mishjen-dlja-adkazu-na-jadzerny-dar/

Святлана Ціханоўская адрэагавала на трэніроўку вайсковых частак баявога прымянення ядзернай зброі і ядзернага забеспячэння, абвешчаную Міністэрствам абароны Беларусі сёння.

Ціханоўская заявіла пра неабходнасць спыніць Аляксандра Лукашэнку, які робіць Беларусь мішэнню для адказу на ядзерны ўдар.

«Цяпер у Беларусі праходзяць вучэнні беларускай і расійскай армій па прымяненні ядзернай зброі. Краіна, якая больш за ўсіх у свеце пацярпела ад Чарнобыльскай катастрофы, «мірнага атама», зноў становіцца ядзернай пагрозай — і мішэнню. Ці маглі мы сабе гэта ўявіць?

Але менавіта так адбылося з вайной: мы чулі «абы не было вайны», а вайна, у якой тэрыторыю Беларусі выкарыстоўвалі, зрабіўшы нашу краіну саагрэсарам, ідзе ўжо пяты год.

І ўсё гэта па волі аднаго чалавека.

Навошта рабіць з нашай краіны мішэнь для адказу на ядзерны ўдар? Каб Беларусь была мірнай, трэба спыніць Лукашэнку. Ён вядзе нас да вялікай бяды», — заявіла Ціханоўская.