Аб’яднанне былых сілавікоў BELPOL атрымала ў сваё распараджэнне лісты ТАА «Станопринт Интернешнл», адрасаваныя МТЗ і Беларускай чыгунцы. Яны змяшчаюць камерцыйныя прапановы па прыцягненні замежных рабочых з краін Сярэдняй і Паўднёвай Азіі, а таксама Паўночнай Афрыкі.
Рабочую сілу прапануецца завозіць з Узбекістана, Таджыкістана, Пакістана, Непала, Егіпта, Марока, Лівіі і Туніса. ТАА «Станопринт Интернешнл» было зарэгістравана 16 сакавіка 2026 года. Заснавальнікам кампаніі значыцца ўраджэнец Растова-на-Доне, пенсіянер Міністэрства абароны Аляксандр Чарушын. Асноўным відам дзейнасці арганізацыі ўказаны паслугі турыстычных агенцтваў.
Атрымальнікамі лістоў ад кампаніі сталі многія беларускія прадпрыемствы. Паводле даных BELPOL, дагаворы на рэкрутынг заключылі «Чэрвеньскае ПМС» і «Бярэзінскае ПМС». За падбор і суправаджэнне аднаго работніка кампанія атрымлівае 100 рублёў.
У лістах «Станопринт Интернешнл» падкрэслівае вартасці прапанаванага персаналу: не ўжываюць алкаголь, маюць высокую працаздольнасць, гатовыя да перапрацовак, у Беларусі няма дыяспар, баяцца дэпартацыі. Кампанія таксама абяцае нізкую цякучасць кадраў пры заробку ад 1500 рублёў і кампенсацыі спадарожных выдаткаў.
У лісце Мінскаму аддзяленню БЧ таксама гаворыцца, што прапанаваныя па наяўных вакансіях заробкі ў 950-980 рублёў недастатковыя, каб матываваць грамадзян Непала або Пакістана пераехаць у Беларусь і застацца тут на працяглы тэрмін.
