Источник фото: t.me/KIM_SAMUSENKA
Былы палітвязень Кім Самусенка расказаў пра ўдзел беларускіх добраахвотнікаў ва ўкраінскай аперацыі «Вівальдзі», якая завяршылася вызваленнем 16 населеных пунктаў і 277 кв. км тэрыторыі. Паводле яго слоў, у аперацыі ўдзельнічалі байцы Беларускага добраахвотніцкага корпуса (БДК).
Нагадаем, пра завяршэнне аперацыі 14 кастрычніка паведаміў камандзір 3-га армейскага корпуса УСУ брыгадны генерал Андрэй Білецкі. Паводле прыведзеных Самусенкам даных, аперацыя складалася з чатырох этапаў. Падчас апошняга ўкраінскія сілы вызвалілі Зялёную Даліну, Ліпавое і Калодзезі, вярнуўшы пад кантроль 101 кв. км тэрыторыі.
Агульныя страты расійскага боку ва Украіне — 8 тысяч вайскоўцаў. Таксама паведамлялася пра больш як 250 палонных, знішчэнне каля 68 тысяч расійскіх беспілотнікаў і 3,8 тысячы адзінак тэхнікі. Аперацыя дазволіла сарваць планы расійскіх войскаў па ахопе Славянска-Краматорскай агламерацыі з поўначы, знізіць пагрозу для трасы М-03 Ізюм-Славянск і адкрыць дадатковы маршрут у напрамку Лімана і Славянска.
Як расказаў Самусенка, байцы Беларускага добраахвотніцкага корпуса ўдзельнічалі ў аперацыі ў складзе разведвальнага батальёна HATRED 3-й асобнай штурмавой брыгады 3-га армейскага корпуса УСУ. Яны выконвалі разведвальныя задачы, ладзілі засады, пракладвалі маршруты і ўдзельнічалі ў разведвальна-ўдарных аперацыях.
“Беларускія добраахвотнікі працавалі каля Рэдкадуба, Новага, Ліпавога, Екацярынаўкі і Зялёнай Даліны, а таксама ў лесапалосах каля Калодзезяў, Іванаўкі і Навалюбаўкі”, – напісаў Самусенка.
Паводле даных падраздзялення, на рахунку беларускіх добраахвотнікаў больш за 100 вайскоўцаў праціўніка і каля 20 палонных.
Паводле слоў Самусенкі, падчас аперацыі байцы ліквідавалі грамадзяніна Беларусі Рамана Кандраценку 1990 года нараджэння, які ваяваў на баку РФ. У верасні 2025 года ў адным з магілёўскіх паблікаў публікавалі аб’яву пра яго вышук. Дзе ён знаходзіўся з моманту знікнення да заключэння кантракта з расійскай арміяй, аўтару публікацыі невядома.
Адзін з камандзіраў падраздзялення, адказваючы на пытанні Самусенкі, адзначыў, што першыя этапы аперацыі былі асабліва важныя для БДК.
«Усе этапы задач у складзе аперацыі “Вівальдзі” былі важныя. Асабліва важнымі для БДК былі першыя крокі ў гэтай аперацыі. Пачынаць заўсёды складана. Але станоўчы вынік быў дасягнуты ўжо на першых этапах, што і задало тэмп далейшым дзеянням», – падзяліўся ён.
Паводле яго слоў, добраахвотнікі ўзялі ў палон камандзіраў расійскіх падраздзяленняў і сабралі інфармацыю пра сітуацыю на лініі фронту і ў тыле праціўніка.
Камандзір таксама расказаў, што ў 2026 годзе ўмовы працы разведвальнай пяхоты змяніліся. Цяпер байцам даводзіцца даўжэй дабірацца да раёнаў выканання задач, надаваць больш увагі маскіроўцы і сувязі. Паводле яго слоў, распаўсюджванне беспілотнікаў з цеплавізійнымі і інфрачырвонымі камерамі ўскладніла перамяшчэнне ў начны час.
Падчас аперацыі адзін з беларускіх добраахвотнікаў атрымаў цяжкае раненне. Самусенка заклікаў падтрымаць збор дапамогі для яго.