Bild: Масква прапанавала абмяняць вывад ядзернай зброі з Беларусі на «новы еўрапейскі парадак бяспекі»

Рэдакцыя Reform.news · 13 лістапада 2026, 13:04

https://reform.news/be/bild-maskva-prapanavala-abmjanjac-vyvad-jadzernaj-zbroi-z-belarusi-na-novy-e-rapejski-paradak-bjaspeki/

Расія прапанавала вывесці ядзерную зброю з Беларусі і адмовіцца ад размяшчэння на яе тэрыторыі ракет сярэдняй далёкасці ў абмен на «новы еўрапейскі парадак бяспекі». Пра гэта піша Bild са спасылкай на інфармацыю аб неафіцыйных перамовах па спыненні расійска-ўкраінскай вайны.

Паводле інфармацыі выдання, прапановы, вылучаныя расійскімі прадстаўнікамі, таксама былі прадстаўлены еўрапейскім удзельнікам перамоваў у Абу-Дабі.

Паведамляецца, што Масква патрабуе захаваць за сабой акупаваныя ўкраінскія тэрыторыі і атрымаць кантроль над усім Данбасам, уключаючы раёны Данецкай вобласці, якія застаюцца пад кантролем Кіева. Расійскі план таксама прадугледжвае нейтральны статус Украіны і адмову ад яе ўступлення ў НАТА. Пры гэтым магчымасць членства Украіны ў Еўрасаюзе не выключаецца.

Акрамя таго, прапануецца дэмілітарызаваць парты Адэсы і Мікалаева, каб Украіна не магла выкарыстоўваць іх у якасці ваенна-марскіх баз. Таксама прадугледжваюцца дамоўленасці аб свабодзе суднаходства ў Чорным і Балтыйскім морах.

Патрабаванні Расіі закранаюць і дзейных членаў НАТА. Масква прапануе вывесці Фінляндыю з альянсу і адмовіцца ад размяшчэння ваенных баз НАТА ў Эстоніі, Латвіі і Літве.

Расійскія патрабаванні таксама датычацца Малдовы. Масква прапануе пераўтварыць краіну ў федэратыўную рэспубліку, у якую ўвойдуць Гагаузія і непрызнанае Прыднястроўе. У выпадку ўступлення Малдовы ў Еўрасаюз гэтым рэгіёнам прапануецца даць магчымасць правесці рэферэндумы аб незалежнасці.

У абмен на выкананне сваіх умоў Масква прапануе вывесці ядзерную зброю з Беларусі, адмовіцца ад размяшчэння там ракет сярэдняй далёкасці, а таксама вывесці расійскія войскі з Прыднястроўя, піша рэсурс.

Выданне падкрэслівае, што гаворка ідзе толькі пра адзін з варыянтаў, якія абмяркоўваюцца ў неафіцыйных перамоўных колах. Паралельна дзейнічаюць некалькі груп пасярэднікаў, у тым ліку звязаных з вайскоўцамі, якія канкуруюць паміж сабой. Пры гэтым невядома, ці падтрымлівае Уладзімір Пуцін менавіта гэты план.