Хацелі паралізаваць працу ўрада ў снежні. У Польшчы заявілі пра прадухіленне кібератакі
Рэдакцыя Reform.news · 12 лістапада 2026, 10:23
https://reform.news/be/haceli-paralizavac-pracu-rada-snezhni-u-polshchy-zajavili-pra-praduhilenne-kiberataki/Кіберінцыдэнт, які адбыўся ў польскім сэрвісе адміністрацыйных паслуг ePUAP пазаўчора, быў часткай падрыхтоўкі да больш сур’ёзнай атакі. Пра гэта заявіў у эфіры TVPinfo міністр лічбавізацыі Кшыштаф Гаўкоўскі.
Паводле яго слоў, працаздольнасць сэрвісу ePUAP яшчэ не адноўленая. Вядуцца работы, якія павінны гарантаваць яго бяспеку ў будучыні.
“У нас ужо ёсць пацвярджэнне гэтаму. Мы ведаем, які план быў рэалізаваны, гэта значыць, у нас ужо ёсць прыкметы таго, што яны хацелі паралізаваць працу ўрадавай адміністрацыі ў снежні.
Гэта значыць, тыя, хто ўкараніўся ў сістэму, тыя, хто хацеў яе прагледзець, тыя, у каго быў канкрэтны план, гэта тое, што мы бачым пасля праверкі журналаў, было, па сутнасці, падрыхтоўкай да пэўнага моманту, да свайго роду адміністрацыйнай бомбы, закліканай паралізаваць працу польскіх чыноўнікаў у складаны снежаньскі перыяд. І гэта ўжо можна сказаць. Мы прадухілілі атаку, якая магла прывесці да паралічу адміністрацыі і камунікацыі ўнутры яе ў снежні”, – сказаў ён.
Гаўкоўскі ўдакладніў, што атака прынамсі магла моцна ўскладніць жыццё польскай адміністрацыі. У снежні складаюцца выніковыя дакументы, абмен якімі адбываецца перад святамі. Ён таксама нагадаў, што летась перад Калядамі была зробленая спроба атакаваць энергетычны сектар Польшчы.
“Памятаеце, летась, у снежні, перад Калядамі, перад Новым годам, адбылася атака на польскі энергетычны сектар, і сёння ёсць шмат прыкмет таго, што некаторыя групы рыхтаваліся паралізаваць адміністрацыю”, – сказаў ён.
Гаўкоўскі адзначыў, што атака была зробленая з-за мяжы. Да расследавання ўжо падключана Агенцтва ўнутранай бяспекі. Ён адмовіўся назваць меркаваную крыніцу атакі, бо яе арганізатары маглі выкарыстоўваць сродкі VPN. Міністр паабяцаў, што як толькі будзе ўстаноўленая рэальная крыніца атакі, інфармацыя пра яе будзе абнародаваная.