МУС праводзіць праверку пасля выказванняў віцебскага вядучага пра калегу са словам “прыкарытнікі”

Рэдакцыя Reform.news · 6 лістапада 2026, 20:27

https://reform.news/be/mus-pravodzic-praverku-paslja-vykazvannja-vicebskaga-vjaduchaga-pra-kalegu-sa-slovam-prykarytniki/

МУС праводзіць праверку ў дачыненні да віцебскага вядучага за выказванні на адрас калегі на карпаратыве. Скарга на мужчыну паступіла ў чат-бот МУС «Мы всегда рядом».

Як заяўляе МУС, 38-гадовы вядучы, выступаючы на карпаратыве ў Віцебскім раёне, «выказаўся на адрас калегі ў непрывабнай форме, у тым ліку з выкарыстаннем ненарматыўнай лексікі. Пры гэтым віцяблянін асуджаў яго ўзаемадзеянне з дзяржарганізацыямі ў прафесійнай дзейнасці».

Прыводзіцца фрагмент запісу выступлення. Мужчына кажа: «Забраніраваў ужо нейкі банк на карпаратыў, то не трэба яго зліваць. **** так? Перадайце яму гэтае відэа ***. Сваім 20-працэнтным прыкарытнікам або колькі там у цябе працэнтаў».

МУС пачало праверку, па выніках якой дзеянням мужчыны дадуць прававую ацэнку. Міліцыя таксама папярэдзіла аб адказнасці, у тым ліку крымінальнай, за «размяшчэнне дзеля хайпу і лайкаў у інтэрнэце публікацый, якія не адпавядаюць рэчаіснасці і ствараюць скажонае ўяўленне грамадскасці пра тое, што адбылося».

Пра інцыдэнт раней паведаміў блогер і вядучы з Віцебска Віталь Савельеў. Ён расказаў у TikTok, што адзначаў з калегамі – вядучымі вяселляў – закрыццё сезона. Падчас мерапрыемства ўдзельнікі зладзілі «пражарку» – жорстка жартавалі адзін з аднаго. Праз 2 гадзіны пасля выступлення Віталя да яго прыехаў нарад міліцыі і папрасіў даць тлумачэнні з-за жарту на адрас аднаго з калег. У скарзе было пазначана, што Савельеў дапускаў «абразлівыя выказванні палітычнага характару».