Палата прадстаўнікоў ратыфікавала дагавор аб дружбе з Паўночнай Карэяй
Рэдакцыя Reform.news · 5 лістапада 2026, 12:01
https://reform.news/be/palata-pradsta-niko-ratyfikavala-dagavor-ab-druzhbe-z-pa-nochnaj-karjejaj/Дэпутаты Палаты прадстаўнікоў сёння прынялі законапраект «Аб ратыфікацыі Дагавора аб дружбе і супрацоўніцтве паміж Рэспублікай Беларусь і Карэйскай Народна-Дэмакратычнай Рэспублікай».
Дакумент быў падпісаны ў Пхеньяне ў сакавіку гэтага года падчас візіту ў Паўночную Карэю Аляксандра Лукашэнкі.
У дагаворы Беларусь і КНДР абавязваюцца развіваць адносіны «на аснове прынцыпаў узаемнай павагі дзяржаўнага суверэнітэту, тэрытарыяльнай недатыкальнасці, неўмяшання ва ўнутраныя справы, роўнасці і ўзаемнай выгады і іншых асноватворных прынцыпаў міжнароднага права».
У ім таксама гаворыцца, што бакі не будуць удзельнічаць у саюзах і блоках, «накіраваных супраць ключавых інтарэсаў іншага боку, у тым ліку суверэнітэту, бяспекі, тэрытарыяльнай цэласнасці і права на развіццё, і не прадпрымаюць якіх-небудзь дзеянняў, уключаючы заключэнне дагавораў падобнага роду з трэцімі дзяржавамі». Беларусь і КНДР таксама абавязваюцца не дапускаць выкарыстання сваіх тэрыторый у мэтах узброенай агрэсіі супраць іншага дагаворнага боку.
Беларусь і КНДР абавязваюцца падтрымліваць меры і палітыку, накіраваныя на абарону суверэнітэту, бяспекі, тэрытарыяльнай цэласнасці і права на развіццё. Бакі таксама абавязваюцца актыўна садзейнічаць «у справе супрацьстаяння ўсякага роду гегемоніі і гвалтоўнай палітыцы, у тым ліку незаконным прымусовым мерам, і ўсталяванню справядлівага і роўнага светапарадку».
У дагаворы дэкларуецца супрацоўніцтва ў розных сферах, якое будзе рэалізоўвацца праз галіновыя пагадненні, а таксама шляхам стварэння Сумеснай камісіі.
«Бакі забяспечваюць зручнасць для паездак сваіх грамадзян на тэрыторыю дзяржавы іншага Боку, абараняюць законныя правы і інтарэсы юрыдычных асоб і грамадзян іншага Боку, якія знаходзяцца на яе тэрыторыі, на аснове нормаў міжнароднага права і садзейнічаюць іх рэалізацыі», — гаворыцца ў дагаворы.
Ён заключаны тэрмінам на 10 гадоў і будзе падаўжацца аўтаматычна на 5 гадоў, калі ніводзін з бакоў за 12 месяцаў не паведаміць аб яго спыненні.