Расійскія атакі выклікалі перабоі з электрычнасцю ў Кіеве і Днепрапятроўскай вобласці

Рэдакцыя Reform.news · 31 кастрычніка 2026, 10:30

https://reform.news/be/rasijskija-ataki-vyklikali-peraboi-z-jelektrychnascju-kieve-i-dneprapjatro-skaj-voblasci/

У ноч на 31 кастрычніка расійскія войскі атакавалі Украіну 134 ударнымі беспілотнікамі, у тым ліку 72 рэактыўнымі. Сілы СПА збілі або падавілі 105 дронаў, паведамілі Паветраныя сілы УСУ.

Атака працягвалася з 18:00 30 кастрычніка. Беспілотнікі Shahed, «Гербера» і дроны-імітатары запускалі з тэрыторыі Расіі, а таксама з акупаваных раёнаў Данецкай вобласці і Крыма. Паводле даных украінскіх вайскоўцаў, траплянні зафіксавалі ў 20 месцах, абломкі збітых дронаў упалі яшчэ ў 10.

У Кіеве тры беспілотнікі трапілі ў аб’ект крытычнай інфраструктуры, паведаміў мэр Віталь Клічко. З-за пашкоджанняў узніклі перабоі з водазабеспячэннем. Да раніцы аварыйныя службы аднавілі працу сістэм водазабеспячэння і водаадвядзення, аднак частка раёнаў горада заставалася без электрычнасці.

У Днепрапятроўскай вобласці расійскія войскі паўторна атакавалі энергетычныя аб’екты. Паводле даных ДТЭК, сур’ёзна пашкоджана абсталяванне, у тым ліку на двух аб’ектах кампаніі. Без электрычнасці заставаліся значная частка Дняпра і Каменскага, а таксама жыхары Дняпроўскага і Новамаскоўскага раёнаў.

У Харкаве ў выніку начной атакі беспілотніка па прыватным сектары Аснавянскага раёна пацярпелі 5 чалавек. Напярэдадні ўвечары рэактыўны дрон ударыў па вытворча-складскім будынку прыватнага прадпрыемства ў Слабадскім раёне. Узніклы пажар на плошчы каля 3 тысяч кв. м ліквідавалі. Паводле папярэдніх даных ДСНС, там ніхто не пацярпеў.

Таксама ў Харкаве пасля атакі загарэліся дах жылога дома і гаспадарчыя пабудовы. Пашкоджаныя каля 10 прыватных дамоў, гаспадарчыя збудаванні і аўтамабіль.

У Палтаўскай вобласці пасля расійскай атакі ўзніклі пажары на тэрыторыі некалькіх аб’ектаў прыватнага прамысловага прадпрыемства. Ратавальнікі тушылі ўзгаранні ва ўмовах пагрозы паўторных удараў.