Прэм’ер Літвы абвяргае ціск ЗША з-за транзіту беларускага калію

Рэдакцыя Reform.news · 30 кастрычніка 2026, 18:06

https://reform.news/be/prjem-er-litvy-abvjargae-cisk-zsha-z-za-tranzitu-belaruskaga-kaliju/

Прэм’ер-міністр Літвы Міндаўгас Сінкявічус заявіў, што ЗША не аказваюць ціску на Вільнюс з мэтай аднавіць транзіт беларускіх калійных угнаенняў праз порт Клайпеды. Публікацыі пра такія спробы ён назваў «спробай вымераць тэмпературу» і праверыць рэакцыю краін Еўрасаюза, піша Elta.

«Ніхто на нас сапраўды не цісне, я не адчуваў ціску з боку нашых стратэгічных партнёраў, Амерыкі. Думаю, што гэта хутчэй (…) нейкія кулуарныя размовы, магчыма, спроба вымераць тэмпературу і рэакцыю краін Еўрапейскага саюза, у тым ліку Літвы. Але ніхто не аказвае на нас ціску ні пісьмова, ні вусна, а нават калі б аказваў, мы самастойная краіна, якая праводзіць уласную палітыку, разумее і пагрозы, і прычыны існавання гэтых санкцый», — сказаў Сінкявічус журналістам у пятніцу, 30 кастрычніка.

«Мы вольныя прымаць рашэнні самастойна. Парады — гэта добра, просьбы — таксама добра, але вырашаем мы самі, і пакуль ніякіх пераглядаў санкцыйнай палітыкі не плануем», — заявіў ён.

Раней выданне Politico са спасылкай на чатырох еўрапейскіх чыноўнікаў паведаміла, што спецпасланнік ЗША па Беларусі Джон Коўл у апошнія тыдні цікавіўся ў літоўскіх дыпламатаў магчымасцю змякчэння абмежаванняў на транзіт беларускіх тавараў. Паводле інфармацыі выдання, амерыканскі бок імкнецца знізіць залежнасць ад паставак калійных угнаенняў з Канады, якая забяспечвае каля 80% імпарту гэтай прадукцыі ў ЗША.

Politico таксама пісала, што Коўл уздымае гэтае пытанне на розных узроўнях літоўскага ўрада больш за год. Акрамя Клайпеды, амерыканскі бок вывучаў магчымасць перавозкі беларускага калію праз іншыя балтыйскія парты, у тым ліку Рыгу.