Naviband запісаў песню на верш Алеся Дудара да Начы расстраляных паэтаў

Reform.news · 30 кастрычніка 2026, 13:03

https://reform.news/be/naviband-zapisa-pesnju-na-versh-alesja-dudara-da-nachy-rasstraljanyh-pajeta/

Да Начы расстраляных паэтаў гурт Naviband прэзентаваў новую песню на верш Алеся Дудара «Край шумлівых лясоў», падзяліўшыся ў сацсетках камерным акустычным відэа.

Радкі, якія ляглі ў аснову твора, Дудар напісаў яшчэ ў 1924 годзе — тады 19-гадовы паэт быў адным з самых яркіх прадстаўнікоў беларускага літаратурнага руху і ўваходзіў у лік заснавальнікаў знакавага аб’яднання «Узвышша». Яго талент развіваўся ў часы актыўнага культурнага ўздыму, але вельмі хутка сутыкнуўся з жорсткім ціскам рэжыму.

Алесь Дудар адкрыта выказваўся супраць савецкай рэчаіснасці і падзелу краіны — ужо ў 1929 годзе яго арыштавалі за рэзанансны верш «Пасеклі наш край папалам». Пасля гэтага былі гады цкавання, арышты і ссылка. Апошнюю кропку ў яго жыцці паставіла Ноч расстраляных паэтаў: у кастрычніку 1937-га 32-гадовага паэта і перакладчыка расстралялі ў сутарэннях мінскай турмы НКВД разам з дзесяткамі іншых дзеячаў беларускай культуры.

Музыкі Naviband запісалі твор у жывым акустычным фармаце, вярнуўшы гэтыя радкі ў прастору сучаснасці.

Даведка

У ноч з 29 на 30 кастрычніка 1937 года ў мінскай унутранай турме НКВД былі расстраляныя больш за 100 прадстаўнікоў беларускай інтэлігенцыі — паэты, пісьменнікі, навукоўцы і грамадскія дзеячы. Гэтая трагедыя стала адным з самых чорных сімвалаў разгрому нацыянальнай культуры.

Сёння, калі ў самай Беларусі ўшанаванне ахвяраў рэпрэсій знаходзіцца пад забаронай і пагрозай, акцыя Ноч (не) расстраляных паэтаў ладзіцца па ўсім свеце, аб’ядноўваючы беларускую дыяспару.

Падпісвайцеся на культурныя навіны Reform.news у Telegram