МПЗ не бачыць неабходнасці шукаць новыя “падаткі на багацце”

Рэдакцыя Reform.news · 26 кастрычніка 2026, 08:18

https://reform.news/be/mpz-ne-bachyc-neabhodnasci-shukac-novyja-padatki-na-bagacce/

Міністэрства па падатках і зборах пакуль не збіраецца павялічваць падатковую нагрузку на жыхароў Беларусі з высокімі даходамі. Пра гэта ў эфіры СТБ заявіў кіраўнік ведамства Дзмітрый Кійко.

“На сённяшні момант няма неабходнасці кратна павышаць стаўкі, шукаць новыя падаткі на багацце. Я думаю, тое, што мы ўвялі, гэта тая база, якая ўжо патрабуе нейкіх такіх тонкіх налад. Недзе трэба ўлічыць, спрасціць падатковае адміністраванне для таго, каб было больш зразумела, больш зразумелым быў гэты працэс, як мага менш патрабаваў удзелу самога грамадзяніна, плацельшчыка. Асноўную працу рабілі падатковыя органы, а плацельшчык ужо атрымліваў на рукі гатовы разлік з сумай падатку, якую ён павінен даплаціць. Вось гэтым мы, у прынцыпе, цяпер займаемся і ў такім жа ключы рыхтавалі змены ў падатковым заканадаўстве на наступны год”, – сказаў ён.

Паводле яго слоў, павышаныя падаткі на высокія даходы сёлета прынеслі бюджэту 380 млн рублёў, а сфарміравалі гэтую суму без малога 9 тыс. чалавек. Нагадаем, у Беларусі стаўка падаходнага падатку 25% прымяняецца да даходаў ад 350 тыс. да 600 тыс. рублёў, 30% – да даходаў больш за 600 тыс. рублёў.

Павышаныя стаўкі ў Беларусі таксама прымяняюцца да нерухомасці вялікіх плошчаў. Першыя паведамленні на выплату падатку па іх плацельшчыкі атрымаюць у 2027 годзе. Паводле ацэнкі Кійко, мясцовыя бюджэты атрымаюць ад іх каля 20 млн рублёў. Таксама павышаныя стаўкі транспартнага падатку прымяняюцца да дарагіх аўтамабіляў.

Трэба адзначыць, што ў праекце змен у Падатковы кодэкс на наступны год МПЗ заклала павышаныя стаўкі акцызаў на так званы прэміяльны алкаголь. Да яго міністэрства адносіць алкагольныя напоі, на якія не распаўсюджваецца выключнае права дзяржавы на імпарт.