Літоўскія мытнікі канфіскавалі два Audi за правоз цыгарэт кантрабандай
Рэдакцыя Reform.news · 21 кастрычніка 2026, 10:11
https://reform.news/be/lito-skija-mytniki-kanfiskavali-dva-audi-za-pravoz-cygarjet-kantrabandaj/Літоўскія мытнікі ў пункце пропуску “Мядзінінкай” на мяжы з Беларуссю спынілі дзве спробы кантрабанды цыгарэт.
16 кастрычніка мытнікі выявілі 1744 пачкі цыгарэт Minsk Capital на суму больш за 9 тыс. еўра ў тайніку, абсталяваным пад днішчам Audi Q5. Кіроўца машыны, грамадзянін Беларусі, падчас разбіральніцтва прызнаўся, што вёз цыгарэты ў Літву і меў намер прадаць іх на рынку. Распачата расследаванне, аўтамабіль канфіскаваны, суд пастанавіў арыштаваць мужчыну на месяц.
18 кастрычніка з кантрабандай ужо трапіўся грамадзянін Літвы. Ён уязджаў у краіну на Audi e-tron, зарэгістраваным у Беларусі. У нішы для захоўвання зарадных кабеляў знайшлі 340 пачак цыгарэт Minsk Capital і NZ Gold на суму 1873 еўра.
Цыгарэты і аўтамабіль канфіскавалі. Кіроўца абышоўся пратаколам аб адміністрацыйным правапарушэнні за незаконную перавозку грузаў і парушэнне міжнародных санкцый. З ліпеня 2024 года ўезд у Літву аўтамабіляў з беларускімі нумарамі забаронены.
