Дэлегацыя беларускіх дэмсіл пачала працу на сесіі ПАСЕ

Рэдакцыя Reform.news · 28 верасня 2026, 21:51

https://reform.news/be/djelegacyja-belaruskih-djemsil-pachala-pracu-na-sesii-pase/

Дэлегацыя дэмакратычных сіл Беларусі пачала працу на восеньскай сесіі Парламенцкай асамблеі Савета Еўропы (ПАСЕ), якая праходзіць у Страсбургу з 28 верасня па 2 кастрычніка. У абноўлены склад дэлегацыі ўвайшлі Уладзімір Астапенка, Павел Латушка і Ксенія Луцкіна, іх намеснікамі сталі Яўген Андрэйчык і Аляксандра Мамаева, паведамляе Каардынацыйная рада.

У першы дзень дэлегацыя сустрэлася з прэзідэнткай ПАСЕ Петрай Байр. Бакі абмеркавалі сітуацыю ў Беларусі і рэгіёне, рэпрэсіі, якія працягваюцца, і становішча палітзняволеных. Латушка прадставіў стратэгію дэмакратычных сіл і заявіў пра важнасць прынцыпу «ніякіх размоў пра нас без нас».

Беларуская дэлегацыя таксама сустрэлася з нямецкімі парламентарыямі. Абмяркоўваліся апошнія вызваленні палітзняволеных, дэпартацыі, становішча тых, хто застаецца ў зняволенні, і праблемы беларусаў, якія жывуць у Германіі, у тым ліку з атрыманнем дакументаў і легалізацыяй. Нямецкі бок заявіў, што не бачыць прыкмет паляпшэння сітуацыі ў Беларусі. Бакі таксама абмеркавалі стварэнне ў ПАСЕ групы «За дэмакратычную Беларусь».

На сустрэчы з польскай дэлегацыяй абмяркоўваліся сітуацыя ў рэгіёне і далейшае супрацоўніцтва. Польскі бок пацвердзіў падтрымку беларускіх ініцыятыў у ПАСЕ. Агнешка Памаска расказала пра сваю нядаўнюю паездку ў Беласток і будучае выступленне ў камітэце па культуры, дзе яна мае намер узняць пытанне пра становішча беларускай культуры ў выгнанні.

На працягу сесіі дэлегацыя таксама плануе сустрэчы з нацыянальнымі дэлегацыямі, камітэтамі ПАСЕ, дыпламатамі і прадстаўнікамі ўрадаў асобных краін.