«Чай з прымессю пяску» — у Бараўлянах памутнела вада з-пад крана пасля адключэння электрычнасці

Рэдакцыя Reform.news · 27 верасня 2026, 17:57

https://reform.news/be/chaj-z-prymessju-pjasku-u-bara-ljanah-pamutnela-vada-z-pad-krana-paslja-adkljuchjennja-jelektrychnasci/

У Бараўлянах Мінскага раёна пасля аварыйнага адключэння электраэнергіі пагоршылася якасць вады. Жыхары паведамілі пра мутную ваду, падобную на чай з прымессю пяску, піша Pristalica.by.

Адключэнне адбылося ўначы 26 верасня і працягвалася каля 23 хвілін. Яно закранула ўсе пяць свідравін і тры помпавыя станцыі Водаканала Мінскага раёна. Без электрычнасці таксама заставаліся Ляскоўка і Валяр’янава. Пасля перазапуску помпавых станцый у сістэме падняліся адклады, з-за чаго вада ў некаторых дамах стала мутнай і набыла карычневатае адценне.

Цяпер спецыялісты прамываюць водаправодныя сеткі. Паводле слоў дырэктара ДП «Водаканал Мінскага раёна» Дзмітрыя Дразда, дзве аварыйныя брыгады працуюць на ўчастках з 00:17 і працягваюць праліў водаводаў да поўнага асвятлення вады. У рэзервуарах помпавай станцыі №2 вада адпавядае норме, там знаходзіцца каля 500 кубаметраў запасу. Паводле слоў Дразда, папаўненне запасаў перавышае расход, таму пагрозы поўнага спынення водазабеспячэння няма.

Для жыхароў праблемных участкаў арганізавалі падвоз пітной вады. З 9 раніцы аўтацыстэрна курсіруе па Бараўлянах. Таксама падрыхтаваныя 5 пунктаў раздачы вады з ёмістасцямі аб’ёмам па адной тоне.

Пакінуць заяўку на дастаўку вады можна па тэлефоне 8 (017) 566-00-16.