Суд ЕС зноў адмовіўся здымаць санкцыі з МАЗа і БелАЗа

Рэдакцыя Reform.news · 24 верасня 2026, 18:02

https://reform.news/be/sud-es-zno-admovi-sja-zdymac-sankcyi-z-maza-i-belaza/

ААТ «БелАЗ — кіруючая кампанія холдынга «БелАЗ-Холдынг» і ААТ «МАЗ — кіруючая кампанія холдынга «БелАўтаМАЗ» спрабавалі праз суд абскардзіць уведзеныя супраць прадпрыемстваў санкцыі ЕС, але суд Еўрапейскага саюза пакінуў абмежавальныя меры ў сіле.

Іскі разглядаліся 23 верасня.

Суд прызнаў абгрунтаванай выснову Савета ЕС пра тое, што МАЗ з’яўляецца адным з найбуйнейшых дзяржаўных аўтавытворцаў Беларусі і крыніцай даходаў беларускага рэжыму. Гэтыя абставіны суд палічыў дастатковымі для высновы аб падтрымцы прадпрыемствам рэжыму Аляксандра Лукашэнкі.

Суд таксама адзначыў, што МАЗ застаецца дзяржаўнай кампаніяй і працягвае весці значную камерцыйную дзейнасць, у тым ліку ў Расіі. У рашэнні асобна згадваецца, што Савет ЕС у 2025 годзе ўказаў на пастаўкі МАЗам ваенных грузавікоў расійскай арміі.

БелАЗ абскарджваў падаўжэнне санкцый, сцвярджаючы, у прыватнасці, што Савет ЕС дапусціў памылку ў ацэнцы яго дзейнасці і парушыў права ўласнасці і свабоду прадпрымальніцтва.

Суд палічыў абгрунтаванай выснову аб падтрымцы прадпрыемствам рэжыму Аляксандра Лукашэнкі. У рашэнні БелАЗ характарызуецца як дзяржаўнае прадпрыемства, якое аказвае фінансавую падтрымку рэжыму.

Суд адхіліў абодва іскі і абавязаў прадпрыемствы аплаціць судовыя выдаткі.