СК Беларусі заявіў пра «неаднаразовыя спробы вярбоўкі» для атак на аб’екты інфраструктуры

Рэдакцыя Reform.news · 24 верасня 2026, 16:42

https://reform.news/be/sk-belarusi-zajavi-pra-neadnarazovyja-sproby-vjarbo-ki-dlja-atak-na-ab-ekty-infrastruktury/

Следчы камітэт Беларусі заявіў пра выпадкі, калі невядомыя праз месенджары і сацсеткі прапануюць людзям здзяйсняць атакі на аб’екты інфраструктуры за грашовае ўзнагароджанне.

Паводле сцвярджэння ведамства, патэнцыйных выканаўцаў шукаюць у тэматычных чатах і сацсетках. Спачатку з адрасатамі спрабуюць устанавіць кантакт і ўвайсці ў давер, пасля чаго прапануюць учыніць злачынства.

У якасці прыкладу СК прывёў 18-гадовага маладога чалавека, якому праз Telegram прапанавалі за грошы падпаліць рэлейныя шафы на чыгунцы.

«Зламыснікі не хаваюць, што мэтай такой акцыі на тэрыторыі Беларусі з’яўляецца парушэнне міжнароднай лагістыкі з Расійскай Федэрацыяй, а таксама стварэнне ўмоў для катастрофы на чыгунцы і гібелі людзей. Малады чалавек адразу ж паведаміў пра гэта ў праваахоўныя органы», — гаворыцца ў прэс-рэлізе.

У ведамстве заявілі, што валодаюць інфармацыяй і пра іншыя «неаднаразовыя спробы вярбоўкі», заявіўшы, што дзеянні, якія кваліфікуюцца паводле артыкула 289 КК Беларусі як акт тэрарызму, адносяцца да асабліва цяжкіх злачынстваў. Санкцыя артыкула прадугледжвае ў тым ліку выключную меру пакарання.