У Кангрэсе Савета Еўропы пачалі працу над дакладам пра Беларусь

Рэдакцыя Reform.news · 10 ліпеня 2026, 14:01

https://reform.news/be/u-kangrjese-saveta-e-ropy-pachali-pracu-nad-dakladam-pra-belarus/

У Кангрэсе мясцовых і рэгіянальных улад Савета Еўропы пачалася праца над дакладам пра Беларусь, які плануецца прыняць у сакавіку 2027 года. Пра гэта паведамілі ў прэс-службе Аб’яднанага пераходнага кабінета.

У сустрэчы з генеральным сакратаром Кангрэса Мэцью Моры, якая адбылася ў Страсбургу ў рамках семінара «Лідары перамен: прасоўванне дэмакратыі і правоў чалавека на мясцовым узроўні», узялі ўдзел дэлегаты Каардынацыйнай рады Юрый Губарэвіч і Ірына Халопіца.

Прадстаўнікі КР расказалі пра вынікі выбараў у КР чацвёртага склікання і заявілі, што падчас выбарчай кампаніі беларускія ўлады аказвалі беспрэцэдэнтны ціск. Усе выбарчыя спісы і сама КР былі прызнаныя «экстрэмісцкімі», сваякі кандыдатаў падвергліся рэпрэсіям, а супраць выбараў вялася маштабная кампанія па дыскрэдытацыі і дэзінфармацыі.

Акрамя таго, электронная платформа для галасавання падверглася маштабнай DDoS-атацы. Паводле даных прадстаўнікоў фракцыі «Латушка і Рух за Свабоду», было зафіксавана больш за 24 млрд запытаў і каля 68 ТБ шкоднаснага трафіку. Кошт атакі ацанілі ў сотні тысяч еўра.

На сустрэчы абмяркоўвалася падрыхтоўка даклада Кангрэса мясцовых і рэгіянальных улад Савета Еўропы па Беларусі. Прадстаўнікі КР прапанавалі ўключыць у яго пытанні рэалізацыі Люксембургскіх пагадненняў на мясцовым узроўні ў краінах Савета Еўропы, а таксама доступу былых палітвязняў і іншых пацярпелых ад рэпрэсій беларусаў да мясцовых праграм сацыяльнай падтрымкі.

Па выніках сустрэчы бакі пацвердзілі ўзаемадзеянне паміж Кангрэсам і дэлегацыяй Каардынацыйнай рады пры падрыхтоўцы будучага дакумента.