Памёр дыпламат і лінгвіст Пётра Садоўскі

Рэдакцыя Reform.news · 6 ліпеня 2026, 09:30

https://reform.news/be/pamjor-dyplamat-i-lingvist-pjotra-sado-ski/

Памёр вядомы беларускі лінгвіст, палітык і дыпламат Пётра Садоўскі. Яму было 87 гадоў. Пра смерць Садоўскага паведаміла яго дачка Аліна.

«Сябры, позна ўвечары памёр у хоспісе мой бацька Пётра Садоўскі. Развітанне заўтра, паведамлю дадаткова», — напісала яна ў Facebook.

Пётра Садоўскі нарадзіўся ў 1939 годзе. Ён скончыў Мінскае сувораўскае вучылішча і Мінскі педагагічны інстытут замежных моў. Абараніў кандыдацкую дысертацыю па філалогіі. Працаваў выкладчыкам у ВНУ.

У 1990 годзе Садоўскі быў абраны дэпутатам Вярхоўнага Савета, у якім уваходзіў у фракцыю БНФ. Ён узначальваў камісію па міжнародных справах і знешнеэканамічных сувязях. У 1992–1994 гадах быў паслом Беларусі ў Германіі.

Да пачатку 1996 года заставаўся дэпутатам парламента, удзельнічаў у дэпутацкай галадоўцы.

У 2008 годзе выйшлі яго мемуары «Мой шыбалет».

Напрыканцы 2019 года ўдзельнічаў у акцыях супраць паглыбленай інтэграцыі з Расіяй.