«Вясна» мае дадзеныя пра 184 фігурантаў «справы Гаюна», змешчаных пад варту

Рэдакцыя Reform.news · 12 красавіка 2026, 15:15

https://reform.news/be/vjasna-mae-dadzenyja-pra-184-figuranta-spravy-gajuna-zmeshchanyh-pad-vartu/

Праваабарончы цэнтр “Вясна” валодае інфармацыяй не менш як пра 184 пацверджаных фігурантаў «справы Гаюна», змешчаных пад варту. Адзначаецца, што агульная колькасць затрыманых значна большая — праваабаронцам вядома пра шэраг затрыманняў, якія адбыліся ў апошні час, у тым ліку ў лютым.

Суды па «справе Гаюна» праходзяць практычна штодня. З пачатку года ў “спіс экстрэмісцкіх матэрыялаў” МУС дадалі 278 чалавек, асуджаных за «садзейнічанне экстрэмізму», — пераважная большасць з іх праходзяць менавіта па «справе Гаюна».

Паводле інфармацыі “Вясны”, большасці фігурантаў справы прызначаюць “хатнюю хімію”, аднак вядомыя і выпадкі рэальнага пазбаўлення волі.

«Беларускі Гаюн» — маніторынгавы OSINT-праект, які адсочвае ваенную актыўнасць расійскіх і беларускіх войскаў. Маніторынгавая група была створана перад пачаткам расійска-ўкраінскай вайны актывістам Антонам Матолькі. У пачатку лютага 2025 года сілавікі атрымалі доступ у чат з ботам праекта. Пасля гэтага праект абвясціў пра спыненне працы.