Следчы камітэт зноў пагражае беларусам за мяжой перад Днём Волі

Рэдакцыя Reform.news · 23 сакавіка 2026, 11:11

https://reform.news/be/sledchy-kamitjet-zno-pagrazhae-belarusam-za-mjazhoj-perad-dnjom-voli/

Следчы камітэт Беларусі выступіў з пагрозамі ў адрас беларусаў, якія пражываюць за мяжой. Яны датычацца ўдзелу ў мерапрыемствах, прысвечаных Дню Волі, які адзначаецца 25 сакавіка.

“Следчы камітэт паведамляе, што сучасная методыка дазваляе ідэнтыфікаваць асобу кожнага. Задзейнічаны актыў будзе выяўлены, дзеянні кваліфікаваны ў адпаведнасці з Крымінальным кодэксам Рэспублікі Беларусь, прыцягнуты да адказнасці, пры неабходнасці, з ужываннем механізму спецыяльнай вытворчасці і канфіскацыяй маёмасці на тэрыторыі нашай краіны”, — заявіў афіцыйны прадстаўнік СК Аляксандр Сухадольскі.

Падобныя пагрозы ў апошнія гады публікуюцца штогод. Пасля правядзення мерапрыемстваў, як правіла, у СК заяўляюць, што ўстанавілі асобы шэрагу ўдзельнікаў і праводзяць у дачыненні да іх следчыя дзеянні.