IGFM не адмовіцца ад працы па Беларусі, нягледзячы на прызнанне сацсетак «экстрэмісцкімі»

Рэдакцыя Reform.news · 13 сакавіка 2026, 16:36

https://reform.news/be/igfm-ne-admovicca-ad-pracy-pa-belarusi-njagledzjachy-na-pryznanne-sacsetak-jekstrjemisckimi/

Міжнароднае таварыства правоў чалавека (IGFM) заявіла, што не мае намеру спыняць працу па Беларусі пасля таго, як беларускія ўлады прызналі яго старонкі ў сацыяльных сетках «экстрэмісцкімі матэрыяламі».

«IGFM не дазволіць запалохаць сябе гэтым рашэннем і працягне сваю працу па Беларусі», — гаворыцца ў заяве арганізацыі, апублікаванай у X.

Аўтары таксама падкрэслілі, што з моманту фальсіфікацыі выбараў 2020 года і наступных рэпрэсій сотні тысяч беларусаў пакінулі краіну, тысячы асуджаныя да працяглых тэрмінаў зняволення.

“Мы стаім на баку мужных беларусаў, якія адстойваюць правы чалавека, свабоду сходаў, свабоду прэсы, плюралізм і свабоду слова”, — заявілі ў арганізацыі.

IGFM — міжнародная недзяржаўная некамерцыйная праваабарончая арганізацыя, заснаваная ў Заходняй Германіі ў 1972 годзе. Яна мае статус удзельніка пры Савеце Еўропы і з’яўляецца членам Камітэта па сувязях з недзяржаўнымі арганізацыямі пры Савеце Еўропы.

Нагадаем, беларускія ўлады рэгулярна выкарыстоўваюць абвінавачанні ў экстрэмізме для барацьбы з палітычнымі апанентамі і іншадумствам у цэлым.