Рагожнік пасля нарады ў Лукашэнкі паехаў вучыцца ў Машэнскага

Рэдакцыя Reform.news · 4 лютага 2026, 12:25

https://reform.news/be/ragozhnik-paslja-narady-lukashjenki-paeha-vuchycca-mashjenskaga/

Новы старшыня Віцебскага аблвыканкама Аляксандр Рагожнік пасля нарады ў Аляксандра Лукашэнкі паехаў вучыцца ў Брэсцкую вобласць.

Пра рабочы візіт Рагожніка, здзейснены па даручэнні Лукашэнкі, паведамілі ў выканкаме Брэсцкай вобласці.

«Аляксандр Рагожнік сумесна з першым намеснікам старшыні Брэсцкага аблвыканкама Дзмітрыем Гарадзецкім наведаў пляцоўкі кампаніі „Савушкін“ у Бярозе і Бярозаўскім раёне. Мэта візіту — вывучэнне эфектыўных практык перапрацоўкі малака і сучасных тэхналогій вытворчасці малочнай прадукцыі», — гаворыцца ў паведамленні.

Таксама Рагожніка, ужо ў суправаджэнні старшыні Брэсцкага аблвыканкама Пятра Пархомчыка, павезлі на брэсцкі завод «Савушкіна».

Учора Аляксандр Лукашэнка заявіў, што прыцягвае бізнесменаў Аляксандра Машэнскага і Яўгена Баскіна для вырашэння праблем Віцебскай вобласці. «Савушкін прадукт» кантралюецца Аляксандрам Машэнскім.