Лукашэнка падпісаў указ аб памілаванні 22 чалавек

Рэдакцыя Reform.news · 30 снежня 2025, 10:48

https://reform.news/be/lukashjenka-padpisa-ukaz-ab-pamilavanni-22-chalavek/

Аляксандр Лукашэнка падпісаў указ аб памілаванні 22 чалавек.

“З гэтай колькасці 20 чалавек былі асуджаныя за злачынствы экстрэмісцкай накіраванасці. Сярод памілаваных 15 жанчын і 7 мужчын, у 11 чалавек ёсць непаўналетнія дзеці”, — заявілі ў прэс-службе Лукашэнкі.

Адзначаецца, што ўсе памілаваныя звярнуліся з адпаведнымі хадайніцтвамі, “прызналі віну і раскаяліся ў здзейсненым”.

Рашэнне аб памілаванні прынята “з гуманітарных меркаванняў і ў інтарэсах сем’яў, а таксама з улікам станоўчых характарыстык памілаваных асоб”.

Нагадаем, беларускія ўлады выкарыстоўваюць абвінавачанні ў экстрэмізме для барацьбы з палітычнымі апанентамі і іншадумствам у цэлым.