Скрыншот з рэпартажу СТБ з адкрыцця фестывалю "Лістапад".
На Мінскі Міжнародны фестываль «Лістапад» прыехала цэлы россып расійскіх кінематаграфістаў. Так, сёння ў Доме Масквы адбыўся творчы вечар заслужанай артысткі РСФСР Наталлі Варлей. У межах форуму ладзяцца пазаконкурсныя паказы фільмаў грамадскіх дзеячаў, кінематаграфістаў і прыхільнікаў літары Z Мікалая Бурляева і Карэна Шахназарава. Таксама сёння на кінастудыі «Беларусьфільм» прайшла сустрэча з рэжысёркай стужак пра гардэмарынаў Святланай Дружынінай.
Святлана Дружыніна прывезла на фестываль два новых фільма з серыі пра гардэмарынаў: «Гардемарины 1787. Мир» і «Гардемарины 1787. Война» 2023 года. Сёння на кінастудыі «Беларусьфільм» была паказана першая частка.
«Беларусы — цудоўныя людзі. Я прыехала да вас як у родны дом, і здзіўляюся вашаму гораду, яго чысціні», — цытуе словы рэжысёркі з публічнай сустрэчы БелТА. Народная артыстка Расійскай Федэрацыі дадала, што прыязджала на фестываль у Мінск у далёкім 2004 годзе.
Мікалай Бурляеў на фестывалі прэзентуе дзве карціны: «Лермонтов» (1973), у якой сыграў як акцёр, і «Боже! Чувствую приближение твоё!» (2023) пра Андрэя Таркоўскага, на якой выступіў рэжысёрам. На мінулым «Лістападзе» «Боже! Чувствую приближение твоё!» быў прызнаны найлепшай дакументальнай стужкай.
«Мы часова нараджаемся ў гэтае жыццё, каб потым нарадзіцца ў жыццё вечнае. Пра гэта наогул забыліся. Кінематограф поўзае па гарызанталі і спаўзае ў апраметную. Кінематограф свету і, на жаль, доўгія гады кінематограф Расіі туды спаўзаў. Але зараз, як казаў Гогаль, ідзе бой за душу чалавека», — разважаў расійскі грамадскі дзеяч падчас паказаў стужак.
Рэжысёр таксама дадаў, што спадзяецца, што гэтыя два фільмы выйдуць і ў беларускі пракат.
Мінскі Міжнародны фестываль «Лістапад» працягнецца да 8 лістапада.
Падпісвайцеся на культурныя навіны Reform.news у Telegram