АПК прапаноўвае адзначаць 2 лютага як Дзень Нязломнасці

Прадстаўніцтва на нацыянальным адраджэнні Аб’яднанага пераходнага кабінета прапануе адзначаць дату 2 лютага як Дзень Нязломнасці.

Па словах в.а. прадстаўніка па нацыянальным адраджэнні Паўла Баркоўскага, новае свята прысвечана «гераізму, стойкасці і адданасці ідэалам свабоды». У мінулым годзе яго адзначалі як «Дзень герояў і гераінь».

«Ён прысвечаны памяці нашага нацыянальнага героя Кастуся Каліноўскага – гэта яго дзень нараджэння. І таксама гэтая дата нагадвае пра подзвіг многіх беларусаў і беларусак, якія аддалі шмат сіл, каб зрабіць нашую краіну свабоднай і шчаслівай. Не заўсёды іх шлях прыводзіў да перамогі, але яны змагаліся, нягледзячы ні на што», — кажа Баркоўскі.

АПК прапаноўвае да гэтага дня шэраг тэм, аб якіх можна напісаць у сацсетках:

• пра сучасных герояў – актывістаў, валанцёраў, палітвязняў, якія змагаюцца за свабодную Беларусь, і прысвяціць гэтыя матэрыялы новаму святу;
• пра постаць Кастуся Каліноўскага ў нашай гісторыі, пра яго ідэі і ўплыў на сучаснасць;
• пра выбітных асоб мінулага і сучаснасці, чые каштоўнасці і ідэі важныя для захавання мовы, культуры і беларускай ідэнтычнасці.