Фота: grodnoplustv.by
Кафедральным касцёле Святога Францішка Ксаверыя (Фарны касцёл) пасля паўтара года карпатлівай працы адбылося ўрачыстае адкрыццё адноўленага алтара Маці Божай Нястомнай Дапамогі. Гэты барочны алтар, усталяваны ў канцы XVIII стагоддзя, ні разу не рэстаўраваўся і патрабаваў поўнай рэканструкцыі. Упершыню за больш чым сто гадоў з яго быў зняты абраз Маці Божай Нястомнай Дапамогі для працяглай рэстаўрацыі і аднаўлення пазалоты сусальным золатам 999 пробы.
Першымі на сюжэт Grodno Plus TV звярнула ўвагу «Наша Ніва».
Каб выратаваць драўляную канструкцыю, майстрам прыйшлося разабраць яе па кавалачках да самай асновы. Галоўнымі ворагамі шэдэўра сталі час, вільгаць і шкоднікі.
Мастак-рэстаўратар Елісей Лёля апісаў працэс як амаль ювелірны: «Прыйшлося некаторыя элементы замяніць, некаторыя — умацаваць, пераклеіць кожную дошчачку, кожны сантыметр алтара перабраць».
Мастак-рэстаўратар Мікалай Лёля падкрэсліў, што галоўнай задачай было захаваць аўтэнтычнасць, а не ўнесці нічога новага: «Захаваць тое, што было, трохі панавіць… Па жывапісе зрабілі таніроўкі, бо дзесьці былі страты — але гэта вінаваты час».
Неабходнасць маштабнай сістэматычнай рэстаўрацыі, якая вядзецца ў касцёле ўжо каля 20 гадоў, прадыктавана наступствамі Другой сусветнай вайны.
Пробашч касцёла ксёндз Ян Кучынскі паведаміў, што сёння адноўлена ўжо 8 з 13 алтароў. Аднак «рэха вайны» адчуваецца дагэтуль.
Наступным этапам стане выратаванне алтара Святога Казіміра, які знаходзіцца ў крытычным стане: «Ён знаходзіцца ў стане крытычным… ніхто яго не чапаў 80 гадоў», — адзначыў ксёндз Ян Кучынскі.
Адноўлены алтар Маці Божай Нястомнай Дапамогі стаў падарункам вернікам і турыстам да будучага юбілею: 6 снежня 2025 года гродзенскі Фарны касцёл адзначыць сваё 320-годдзе асвячэння Базылікі Катэдральнай.
Падпісвайцеся на культурныя навіны Reform.news у Telegram