Рэжысёр Аляксей Палуян, чыя дакументальная стужка «Кураж» стала адной з самых гучных падзей на Берлінале ў 2021 годзе, вяртаецца на Берлінскі кінафестываль-2026 у межах праграмы для прафесіяналаў кіно Berlinale Talents. Сёлета ён прадставіць свой новы мастацкі праект INCUBATOR у межах прэстыжнай лабараторыі Berlinale Script Station.
Што такое Script Station?
Гэта элітарная пляцоўка для прафесіяналаў, куды штогод адбіраюць толькі невялікую колькасць перспектыўных праектаў з усяго свету. Удзел у ёй дазваляе рэжысёру давесці драматургію будучай стужкі да дасканаласці пад кіраўніцтвам вядучых міжнародных экспертаў. Гэта крытычна важны этап для атрымання еўрапейскага фінансавання і пошуку партнёраў.
Пра што будучы фільм?
Сюжэт INCUBATOR — гэта вострая драма на стыку дзвюх трагедый. Галоўная гераіня, 35-гадовая беларуска Марыя, становіцца сурагатнай маці ва Украіне, каб сабраць грошы на вызваленне свайго мужа Віктара, асуджанага ў Беларусі на 9 гадоў па палітычных матывах. Аднак планы жанчыны руйнуюцца з пачаткам поўнамаштабнай вайны: Марыя разам з нованароджаным дзіцем, якое прызначалася для нямецкай пары, апынаецца ў зоне баявых дзеянняў.
Праект ствараецца ў капрадукцыі Германіі і Францыі. Аўтарам сцэнарыя і рэжысёрам заяўлены Аляксей Палуян. Вытворчасць фільма запланавана на 2028 год.
Пра высокі патэнцыял праекта сведчыць склад міжнароднай прадзюсарскай групы. Побач з даўнімі партнёрамі Палуяна — Ушы Фельдгес і Ансгарам Фрэрыхам (кампанія Basis Berlin), якія працавалі над яго папярэднімі стужкамі, — да каманды далучыўся дасведчаны французскі тандэм Мілены Пойла і Жыля Сакута (TS Productions). Удзел такіх партнёраў не толькі забяспечвае праекту прафесійнае экспертнае суправаджэнне, але і адкрывае магчымасці для маштабнай міжнароднай капрадукцыі.
Беларускі след на Берлінале-2026
Акрамя асабістага поспеху Палуяна, на фестывалі чакаецца актыўная праца Беларускай незалежнай кінаакадэміі (BIFA).
Сёлета Акадэмія плануе працу беларускага стэнда на European Film Market (EFM), які з’яўляецца галоўнай пляцоўкай для камунікацыі нашых творцаў з еўрапейскімі фондамі і партнёрамі.
Таксама BIFA ладзіць прэзентацыю праектаў поўнаметражных фільмаў беларускіх фільммейкераў на EFM. Гэта будзе ўжо чацвёрты год запар, калі беларускія кінематаграфісты шукаюць партнёраў і фінансаванне на адной з найбуйнейшых кінапляцовак свету. Сёлета ў пітчынгу плануецца ўдзел ад пяці да сямі кінапраектаў.
Берлінскі кінафестываль пройдзе ў 2026 годзе з 12 па 24 лютага.
Падпісвайцеся на культурныя навіны Reform.news у Telegram
