Абвешчаны збор сродкаў на аперацыю і рэабілітацыю для беларускага танцора Ігара Шугалеева

Сябры і калегі беларускага танцора і перформера Ігара Шугалеева арганізавалі збор сродкаў на чарговую аперацыю на каленным суставе і рэабілітацыю.

Ігар Шугалееў з 2021 года знаходзіцца ў эміграцыі і цяпер жыве ў Варшаве. Яго працы былі прадстаўлены на найважнейшых еўрапейскіх фестывалях тэатра і сучаснага мастацтва, дзякуючы яго спектаклям свет даведваецца пра падзеі ў Беларусі.

Праект «Цела, якому вы тэлефануеце, зараз недаступнае» быў прэзентаваны 38 разоў у 10 краінах Еўропы. Сродкі, сабраныя ад выступаў, былі накіраваныя на дапамогу пазбаўленым волі ў Беларусі.

На гэты раз дапамога патрэбная Ігару, каб вярнуцца на сцэну і працягнуць змаганне за свабоду і справядлівасць.

Самы цяжкі этап лячэння ўжо па-за плячыма. Дзякуючы падтрымцы Беларускага Свабоднага тэатра, Інстытута тэатра ў Варшаве і надзейных сяброў летам гэтага года была паспяхова праведзена першая аперацыя.

Аднак у снежні 2023 года яго чакае яшчэ адна аперацыя, а затым доўгая рэабілітацыя, якая працягнецца да ліпеня 2024 года.

Цяпер ён можа перасоўвацца на мыліцах і кожны дзень змагаецца, каб вярнуцца да нармальнага жыцця і прафесійнай дзейнасці.

Каб працягваць лячэнне, трэба сабраць 38 тысяч злотых.

Сябры танцора гатовыя прыняць любую дапамогу.

Ахвяраваць на аперацыю і рэабілітацыю Ігара Шугалеева можна па спасылцы.

Падпісвайцеся на культурныя навіны Reform.by у Telegram