Абвешчаны прыём заявак на World Press Photo Contest 2026

Здымак-лаўрэат World Press Photo 2021 аўтарства беларускай фатографкі Надзі Бужан. "Вольга Севярынец чакае свайго мужа Паўла каля будынка ізалятара на вуліцы Акрэсціна ў Мінску, Беларусь".

Адкрыты прыём заявак на штогадовы міжнародны конкурс World Press Photo Contest 2026, які адзначае і ўшаноўвае найлепшую фотажурналістыку і дакументальную фатаграфію, створаную за мінулы год.

Арганізатары запрашаюць фатографаў з усяго свету, каб прадставіць «багатую разнастайнасць гісторый і перспектыў».

Удзел бясплатны і адкрыты для ўсіх прафесійных фатографаў, якія працуюць у сферы фотажурналістыкі і/ці дакументальнай фатаграфіі.

Пераможцам абяцаюць:

Грашовая ўзнагарода да $11 000 (адзінаццаці тысяч еўра).
Уключэнне ў штогадовую падарожную выставу, якую штогод бачаць больш за 4 мільёны наведвальнікаў у больш чым 80 гарадах па ўсім свеце.
Размяшчэнне прац на сайце і ў сацыяльных сетках World Press Photo, колькасць падпісчыкаў якіх перавышае 2 мільёны.
Уключэнне ў штогадовы альманах конкурсу, які выдаецца на шасці мовах накладам больш за 30 000 асобнікаў з сусветным распаўсюдам.

Дэдлайн падачы заявак: 17 студзеня 2026 года.

Варта адзначыць, што беларускія фатографы неаднаразова станавіліся лаўрэатамі і прызёрамі World Press Photo, што пацвярджае высокі ўзровень нацыянальнай фотажурналістыкі.

У 2020 годзе Таццяна Ткачова заняла 2-е месца ў глабальнай катэгорыі «Партрэтная гісторыя» за серыю «Паміж правам і сорамам» пра права жанчын на аборты.

У 2021 годзе Надзея Бужан узяла 2-е месца ў глабальнай катэгорыі «Гарачыя навіны» (Spot News, Single) за свой здымак «У адзіноце» (Вольга Севярынец каля Акрэсціна).

У 2025 годзе Таццяна Чыпсанава стала рэгіянальным пераможцам у катэгорыі «Доўгатэрміновы праект» (Азіяцка-Ціхаакіянскі рэгіён) за праект «Тэ Урэвера – жывы продак народу тухоэ».

Падаваць заяўку можна тут.