Скрын з анлайн-рэсурса.
«Мы лічым надзвычай важным расказваць гісторыі беларускіх палітвязняў — пра тое, што людзі перажываюць як у зняволенні, так і выйшаўшы на волю», — так апісваюць свой новы проект — часопіс «Politzek Times/Время политзеков» — каманда Politzek.me.
«Наша місія зрабіць усё магчымае, каб кожны герой быў пачуты, — падкрэсліваюць стваральнікі. — [Але] мы не хочам цыкліцца толькі на негатыўным досведзе, пра катаванні і рэпрэсіі ведаюць шмат хто. На старонках часопіса мы будзем публікаваць асабістыя гісторыі палітзняволеных, іх рэфлексіі аб новым досведзе і моцы пераадолення. Гэта гісторыі з душой».
На сайце працуюць некалькі рубрык.
Напрыклад, «Твары», — у межах якой можна дазнацца гісторыі асобаў, якія прайшлі досвед зняволення — там ужо апублікаваныя інтэрв’ю з Наталляй Хершэ, Аляксандрам Дземідовічам, Алегам Сянцовым.
«Таксама мы хочам аб’яднаць беларускіх герояў, нагадваючы пра тое, што салідарнасць і вера ў будучыню Беларусі нікуды не знікла. Гэта будуць гісторыі салідарнасці, самі героі распавядуць нам, як па-ранейшаму людзі падтрымліваюць адно аднога, знаходзячыся ўнутры рэпрэсій і пераследу», — дадае каманда сайта.
На рэсурсе ёсць і ўкладка «Знаходзім у сваіх» — яна пра бізнес палітзняволеных. Валодаючы інфармацыяй, можна набыць рэчы ці скарыстацца паслугамі кампаній людзей, якія маюць у гэтым патрэбу.
«Ды, вядома, пішам лісты палітвязням, — мы запрашаем далучыцца да нашага праекта медыйных персонаў, напісаўшы адкрыты ліст палітзняволенаму ці палітзняволенай», — заахвочваюць уключыцца ў справу стваральнікі «Politzek Times/Время политзеков”.
Спасылка на часопіс — тут.
Падпісвайцеся на культурныя навіны Reform.by у Telegram