Фота: t.me/radiokultura
У рамках Нацыянальнага фестывалю беларускай песні і паэзіі «Маладзечна — 2026» у Мінскім абласным краязнаўчым музеі адкрыўся выставачны праект «Этнамузыка Беларусі» Івана Кірчука — беларускага музыканта, фалькларыста, пісьменніка, педагога, аўтара эксперыментальных музычных праграм, рэканструкцый абрадаў і святаў, уладальніка калекцыі музычных інструментаў практычна з усіх краін свету.
У калекцыі музыкі — больш за паўтысячы музычных інструментаў, якія творца прывёз з экспедыцый ці атрымаў у падарунак ад народных майстроў.
Асноўнае месца ў экспазіцыі займаюць беларускія акарыны, жалейкі, званы і колавая ліра. Сярод цікавых музычных інструментаў – афрыканскія і беларускія калімбы, тыбецкі ханк, непальскія чашы, незвычайныя побытавыя і «музыкальныя» рэчы (капыткі коз, шкарлупіны арэхаў, драўляныя трашчоткі), з дапамогай якіх продкі ўзнаўлялі гукі прыроды.
Сустрэча з наведвальнікамі прайшла ў фармаце монаспектакля «Дарожка мая…», сцэнарый якога створаны на аснове сабраных аўтарам цягам дзесяці гадоў матэрыялаў. Праграма нагадвае рытуальны тэатр — рэканструкцыю аўтэнтычных беларускіх абрадаў, песень і містэрый, якая аб’ядноўвае духоўную культуру продкаў са шматлікімі традыцыйнымі абрадамі.
У монаспектаклі прагучалі фрагменты старажытных замоў, народныя песні, найгрышы на акарыне, жалейцы, дудзе, ліры.
Выставу можна наведаць да сярэдзіны чэрвеня.
Падпісвайцеся на культурныя навіны Reform.news у Telegram