10–11 красавіка ў Варшаве праходзіў фестываль сучаснай беларускай драматургіі «Dramatyzacja». Ён стаўся фіналам конкурсу для драматургаў, які арганізаваў Беларускі Інстытут тэатра.
На конкурс аўтары падалі 66 п’ес, з іх прафесійным журы было адабрана 5. Над кожным драматургічным тэкстам з кароткага спісу папрацаваў рэжысёр, і вынікі паказалі ў Варшаве ў выглядзе перфарматыўных чытанняў.
Пасля кожнага чытання адбываліся абмеркаванні з удзелам аўтараў і тэатральных крытыкаў.
Жыццё чалавека ў часы перамен, войнаў, пераследу, няпростых выбараў, пошук ідэнтычнасці – у пяці спектаклях-чытках увасобіліся вострыя, надзённыя тэмы. Некаторыя з гэтых тэмаў заснаваны на дакументальных гісторыях, напрыклад, апошні міні-спектакль «Рудая вавёрка» (Хася Корнева, рэжёсёр Аляксандр Енджэеўскі) наведалі яго галоўныя гераіні, дзве дзяўчыны, якія, атрымаўшы ў Беларусі «хімію», перайшлі мяжу і апынуліся спачатку ў Літве, а пасля ў Польшчы. А некаторыя былі вырашаны ў сюррэалістычным ключы, бо як жа іначай асэнсаваць нашу сённяшнюю рэальнасць.
Сярод апошніх — п’еса Рэнаты Талан «Лімб» (рэжысёркай паказу стала Жэня Давідзенка), якая і стала пераможцай конкурсу. Неверагодная, але цалкам рэальная ў нашых умовах гісторыя, зазнае метамарфозы і ператвараецца ці то ў маркесаўскі, ці то ў кафкіянскі сюжэт. А галоўная гераіня, якая развітвалася з памерлымі ў Беларусі ад імя іх родных, што знаходзяцца за мяжой і не могуць праехаць на пахаванні, апынаецца ў яго палоне.
Арт-дырэктарка фестывалю Валянціна Мароз заўважыла, што некаторыя з аўтараў тэкстаў застаюцца ў Беларусі і выступаюць пад псеўданімамі (у тым ліку пераможца конкурсу). Яна не чакала, што так шмат людзей наведвае фестываль. І выказала спадзеў, што праз год адбудзецца наступная «Dramatyzacja».
Фестываль сучаснай беларускай драматургіі «Dramatyzacja» безумоўна варты асобнай размовы, таму неўзабаве яму будзе прысвечаны асобны матэрыял, дзе мы раскажам пра ўсе п’есы з кароткага спісу.
Падпісвайцеся на культурныя навіны Reform.news у Telegram
