Комплекс «Лошыцкі». Фота: minsknews.by
Два будынкі старога бровара і былы млын Лошыцкай сядзібы рэканструявалі і ператварылі ў комплекс «Лошыцкі», які складаецца са шматфункцыянальнага будынка, гатэля з залам урачыстасцей, прызначаным у тым ліку для цырымоніі шлюбу, і кавярні.
Гаспадарчы комплекс быў пабудаваны на мяжы ХІХ-ХХ стагоддзяў на другім беразе Лошыцы ад сядзібы. Будынкі былі ўключаны ў спіс гісторыка-культурных каштоўнасцяў.
Падчас рэстаўрацыі да падмуркаў была разабрана вялікая двухпавярховая частка будынка бровара, аднак найбольш каштоўная, чатырохпавярховая частка будынка захавана.
У інтэр‘ерах будынкаў засталіся ўнікальныя архітэктурныя элементы, напрыклад, цагляныя сцены XIX стагоддзя. Фасады будынкаў, у адрозненне ад не вельмі стыльных інтэр’ераў, захавалі сваё гістарычнае аблічча.
«Усё, што старае — выглядае сімпатычна, усё, што новае — вее танным калгасам з прэтэнзіяй», — піша тэлеграм-канал «Спадчына».
Нагадаем, што Лошыцкі парк аднавілі і добраўпарадкавалі ў 2011 годдзе. У 2014 годзе завяршылася рэстаўрацыя сядзібнага дома і флігеля, былі адноўлены ўсе дэталі гэтых архітэктурных помнікаў: дэкор, ляпніна, кафляныя печы і камін. У 2015-м у сядзібе адкрыўся музей.
Падпісвайцеся на культурныя навіны Reform.news у Telegram