Фота: сацсеткі кінематаграфіста.
Стала вядома пра смерць беларускага кінааператара і прадзюсара Андрэя Маталыгі. Трагедыя здарылася ў ноч на 6 лютага на востраве Шры-Ланка, дзе 37-гадовы творца знаходзіўся на зімоўцы.
Паводле інфармацыі ад знаёмых Андрэя, смерць наступіла ў сне. Па папярэдніх дадзеных, прычынай мог стаць сардэчны прыступе, аднак дакладныя абставіны будуць вядомыя пасля экспертызы.
Хто такі Андрэй Маталыга?
Андрэй быў прафесіяналам новага пакалення, які майстэрска спалучаў класічную кінаадукацыю з найноўшымі тэхналогіямі. Выпускнік БДУІР і знакамітай Балтыйскай школы кіно і медыя (BFM) у Таліне, ён прайшоў шлях ад асістэнта на буйных еўрапейскіх пляцоўках да аператара-пастаноўшчыка міжнародных праектаў.
Яго камера стварала візуальную мову такіх стужак, як: «The End of the Chain» (2017) — удзел у аператарскай групе знакавага эстонскага фільма, «Roof Knocking» (2017) — аператарская праца ў гэтай драме была адзначана на шматлікіх міжнародных фестывалях (у тым ліку намінацыя на студэнцкі «Оскар»). «White Rabbits» (2023) — адна з апошніх маштабных прац беларуса ў якасці аператара-пастаноўшчыка.
Апошнія гады Андрэй жыў у Берліне і працаваў на стыку мастацтва і тэхналогій. У сваім прафесійным профілі ён пісаў:
«Я крэатыўны відэапрадзюсар, які спалучае стратэгію маркетынгу з сучасным стварэннем кантэнту, у тым ліку з выкарыстаннем штучнага інтэлекту ў працоўных працэсах…».
Таксама беларускі кінематаграфіст здымаў відэагісторыі для Revolut, Siemens, Deutsche Bahn і CNBC па ўсёй Еўропе. Глыбокае разуменне кіно дазваляла яму ствараць не проста рэкламу, а «брэндынгавыя гісторыі», якія чаплялі гледача.
Апошнія гады Андрэй жыў у Берліне, дзе займаў пазіцыю крэатыўнага прадзюсара ў кампаніі Vocal Image. Сябры і калегі згадваюць яго як жывога, таленавітага і вельмі працавітага чалавека. Літаральна за тыдзень да смерці Андрэй дзяліўся планамі на будучыню і казаў, што «зазямліўся» і адчуў новы вектар у жыцці.
Падпісвайцеся на культурныя навіны Reform.news у Telegram