Рада культуры больш не будзе каардынаваць Дні беларускай культуры, аднак запрашае ладзіць імпрэзы пад гэтым брэндам

Беларуская Рада культуры паведаміла, што больш не будзе каардынаваць Дні беларускай культуры.

«Цягам трох гадоў мы клапаціліся, каб Дні беларускай культуры жылі, — паведамляецца ў допісе Беларускай Рады культуры. — Летняе свята, задуманае ў 2021 годзе як фэст паэзіі, песні, супольнасцяў і традыцый, за гэты час паяднала больш як паўтары сотні падзей у 16 краінах, святочная грамада збірала тысячы беларусаў у розных кутках планеты.

Але настаў час для Рады адпусціць гэты праект. Мы будзем вельмі ўсцешаныя, калі вы яго падхопіце і Дні беларускай культуры будуць квітнець у вашых вялікіх і маленькіх суполках».

У рамках Дзён беларускай культуры кожны можа зладзіць імпрэзу, прытрымліваючыся канцэпту. Слоганам глабальнай кампаніі #ByCultureGlobal з’яўляюцца словы «Расказаць Беларусь» (Speak Belarus). Паводле канцэпту, беларусы могуць згуртавацца вакол яскравага, жыццядайнага і сонечнага нацыянальнага свята Купалле, вакол асобаў слаўных землякоў Янкі Купалы, Яна Чачота і Марка Шагала, якія нарадзіліся 7 ліпеня.

Таму менавіта 7 ліпеня — цэнтральная дата, Сусветны Дзень беларускай культуры.

«Расказаць Беларусь» — гэта:

• расказваць пра саміх беларусаў, чым мы жывём сёння, якія мы, як наша беларускасць існуе ва ўмовах неверагодных рэпрэсій, ціску, засілля расейскай культуры (у Беларусі) і адарванасці ад роднай зямлі (калі гаворка пра беларусаў замежжа);
• мовай мастацтва казаць пра нашых палітвязняў;
• казаць пра мінуўшчыну і выбітных персон нашай гісторыі, легендарныя падзеі;
• казаць пра нацыянальныя традыцыі і наш багаты жывы фальклор;
• расказваць пра здабыткі беларускіх творцаў, найлепшыя ўзоры творчасці ў розных жанрах мастацтва (умоўна, нацыянальны беларускі канон);
• расказваць пра тое, чым мы ганарымся, у чым ёсць нашая годнасць і што адрознівае нас ад іншых нацый.

Мапа падзей абнаўляцца не будзе, але хэштэгi #SpeakBelarus i #By_Culture_Global дапамогуць знайсціся ў сацсетках.

Падпісвайцеся на культурныя навіны Reform.news у Telegram