Фота: AFP/Getty.
На 74-м годзе жыцця памёр сусветна вядомы брытанскі фатограф-дакументаліст, член агенцтва Magnum Photos, Марцін Пар (Martin Parr). Пра яго смерць паведаміла Martin Parr Foundation. Смерць выбітнага мастака стала велізарнай стратай для сусветнай арт-супольнасці.
Марцін Пар увайшоў у гісторыю фатаграфіі як майстар сатырычнага, яркага і дэталёвага дакументалізму, які змяніў уяўленне пра жанр.
Творца быў вядомы тым, што адышоў ад традыцыйнай чорна-белай дакументалістыкі, выкарыстоўваючы насычаныя колеры і ўспышку. Ён фіксаваў феномен масавага турызму, глабалізму, спажывецтва і звычайны побыт, знаходзячы ў іх абсурднае і смешнае.
Найвядомыя серыя фатоаграфа — The Last Resort, Small World, Common Sense, British Food — навучылі цэлае пакаленне фатографаў паказваць рэчаіснасць не толькі з жалем, але і з іроніяй, пакінуўшы невычэрпную спадчыну ў візуальнай культуры.
Важна адзначыць, што ў 2014 годзе Марцін Пар наведваў Мінск у якасці спецыяльнага госця фестывалю «Месяц фатаграфіі ў Мінску» па запрашэнні куратара падзеі Андрэя Лянкевіча. Падчас візіту творца выступіў з лекцыяй і сустракаўся з беларускімі фатографамі, падкрэсліўшы сваю зацікаўленасць у падтрымцы беларускай фатаграфіі.
На прэс-канферэнцыі Пар тады падзяліўся сваім бачаннем Беларусі 2010-х:
«Мне вельмі спадабалася ў Беларусі. Тут усё па-іншаму, чым у Расіі. Тут яшчэ шмат рэчаў, якія нагадваюць пра Савецкі Саюз, але пры гэтым вы вельмі хутка рухаецеся да еўрапейскага спажывецкага грамадства. Гэта вельмі цікавы пераходны перыяд для фатаграфавання», — сказаў ён.
У галерэі «У нескладовае» экспанавалася выстава брытанскага фатографа, якая ўяўляла сабой падборку праектаў з розных этапаў ягонай творчасці. Мэтай выставы было прадэманстраваць унікальны стыль аўтара і метадалогію дакументавання спажывецкага грамадства і забаўляльнай культуры ва ўсім свеце.
Як адзначыў Фонд фатографа, разам з Magnum Photos яны будуць працаваць разам для таго, каб захаваць і дзяліцца спадчынай Марціна Пара. Больш падрабязная інфармацыя на гэты конт будзе апублікавана пазней.
Падпісвайцеся на культурныя навіны Reform.news у Telegram