Інтэр'еры касцёла Божага Цела ў нясвіжы. Фота: katolik.life
Інтэр’еры касцёла Божага Цела ў Нясвіжы пачнуць рэстаўраваць. Што будуць рабіць, колькі працягнуцца працы, ці закрыюць храм для парафіі і турыстаў – даведаўся Katolik.life.
Цяпер заканчваецца працэдура выбару падрадчыка для 4-й чаргі рэканструкцыі каталіцкага храма.
У красавіку 2025 года пачнуцца падрыхтоўчыя работы па рэстаўрацыі інтэр’ераў, якія працягнуцца да канца 2030 года. Мяркуючы па фота турыстаў, падрыхтоўчыя працы ўжо пачаліся – паміж калонамі храма заўважаны будаўнічыя рыштаванні.
Праектам прадугледжаны рэстаўрацыя жывапісу малельнай залы, бабінца, прэсбітэрыя, памяшкання правай сакрыстыі ва ўзроўні першага паверха, хораў, сцен лесвіцы правай сакрыстыі ва ўзроўні другога паверха, рэстаўрацыя алтароў, амбона, аднаўленне люстраў, спавядальні, лавак і іншыя працы. Адзначаецца, што гэты праект з’яўляецца толькі пачатковым этапам навуковай рэстаўрацыі інтэр’ераў.
На рэстаўрацыю будзе выдзелена амаль 34 млн рублёў – гэта больш за 10 млн даляраў па цяперашнім курсе. Ліміт фінансавання на 2025 год складае 1 млн 330 тыс. рублёў.
Касцёл у Нясвіжы 1593 года — гісторыка-культурная каштоўнасць і адзіны рэлігійны аб’ект Беларусі, які знаходзіцца ў спісе Сусветнай спадчыны ЮНЕСКА. Да гэтага на працягу 13 гадоў праводзілася рэстаўрацыя фасадаў храма, якая завяршылася ў 2023 годзе.
У апошні раз храм рэканструявалі ў пачатку-сярэдзіне XVIII стагоддзя, гаворыцца ў абгрунтаванні праектных рашэнняў «Белрэстаўрацыі». Касцёл унутры і звонку быў нанова атынкаваны і багата распісаны, з’явіліся новыя алтары. З тых часоў інтэр’еры атрымалі мноства пашкоджанняў – фота, якія іх дэманструюць, прыводзяцца ў дакуменце «Белрэстаўрацыі».
Гэта страта малюнка фрэсак з-за замочвання скляпенняў, разбурэнне фрагментаў скульптур, шматгадовыя пыл і курава на барэльефах, аварыйны стан абразоў. Паглядзець дакумент з фотаздымкамі і падрабязным апісаннем інтэр’еру храма і яго стану можна тут.
Нягледзячы на маштабныя працы, храм не закрыюць для парафіі, толькі для турыстаў.
Падпісвайцеся на культурныя навіны Reform.news у Telegram
