Скрыншот з відэа.
«Утульны» кліп на песню «Каляды ў Менску» Лявона Вольскага за дзень сабраў больш за сем тысяч праглядаў. У відэа, створаным у «вязаным» стылі, краявіды Менску паўстаюць у выглядзе звязаных дамкоў і вуліц. А таксама аўтары роліка правялі дэкамунізацыю савецкіх (і не толькі) назваў.
У прыватнасці, у відэа сталічныя кінатэатры «Кастрычнік» і «Перамога» перайменаваныя ў «Альгерд» і «Рагнеда». А знакаміты надпіс на будынках на плошчы Перамогі «Подвиг Народа Бессмертен» заменены на «Вялікае Княства Несьмяротнае».
На будынку Опернага тэатра лунае бела-чырвона-белы сцяг, а вокліч «Жыве Беларусь» упрыгожвае Цэнтр моды на Нямізе. (Узгадаем, што надпіс, якая знаходзіцца на будынку зараз — «Слава пераможцам!» — з’явілася там толькі ў 2017 годзе).
«Песьня–надзея, песьня–зычэньне, песьня–прадказаньне, — прэзентаваў новую працу Лявон Вольскі. — Вядома, што на Каляды цуды адбываюцца, мары зьдзяйсьняюцца, і ў гэтай песьні мы таксама крыху памарылі пра цуд на Каляды».